Украинскиот претседател Володимир Зеленски предупреди дека ублажувањето на американските санкции против Русија само ќе го зајакне Владимир Путин и ќе ја отежне можноста за завршување на војната. Во интервју за Си-ен-ен, Зеленски изјави дека несогласувањата со американскиот претседател Доналд Трамп не се лични, но дека Украина не може да се одбрани без доволно оружје и целосно функционални сателитски комуникации.
„Ова не е нешто лично меѓу мене и претседателот Трамп“, изјави Зеленски во разговор со новинарката Кристијан Аманпур во Киев.
Тој предупреди дека приближувањето на Вашингтон кон Москва и олеснувањето на санкциите нема да го поттикнат Путин да ја запре војната.
Според Зеленски, рускиот претседател нема намера да се откаже од воените цели, а секое намалување на економскиот притисок му обезбедува дополнителни ресурси за продолжување на нападите врз Украина.
Односите меѓу Киев и Вашингтон се влошија во последните недели, откако администрацијата на Трамп дозволи олеснување на дел од санкциите против Русија и најави договор за купување руски енергенси.
Зеленски претходно оцени дека со таквите потези Трамп застанува на погрешната страна од историјата, додека американскиот претседател ги брани своите одлуки како дел од напорите за постигнување мировен договор.
Дополнителен проблем за Украина се ограничувањата на сателитските комуникациски услуги на компанијата „Спејс икс“, во сопственост на Илон Маск.
Иако Трамп во четвртокот изјави дека Маск го обновил пристапот на Украина до воената верзија на системот „Старлинк“, Зеленски тврди дека услугата „Старшилд“ сè уште не функционира со полн капацитет.
Според украинскиот претседател, ограничената брзина на комуникациите директно ја намалува ефикасноста на украинските пресретнувачки дронови, кои се користат за уништување руски беспилотни летала.
Украинските сили развиле дронови способни да пресретнуваат брзи руски летала, но за нивното функционирање е потребна стабилна сателитска врска. Ограничувањата, според Киев, ја отежнуваат одбраната од нападите врз градовите и енергетската инфраструктура.
Трамп одби да потврди дали лично побарал од Маск да ги отстрани ограничувањата. Дел од украинските воени единици пријавиле подобрена врска, но други и понатаму се соочуваат со технички проблеми.
Зеленски потврди дека американската разузнавачка размена со Украина е обновена, што овозможува навремено предупредување за претстојни руски ракетни напади.
Сепак, тој нагласи дека предупредувањето не е доволно доколку Украина нема ракети со кои може да ги пресретне нападите.
Киев се соочува со сериозен недостиг од ракети за противвоздушните системи „Патриот“, кои имаат клучна улога во одбраната од руски балистички проектили.
„Она што го бараме од нашите партнери е да не му дозволат на Путин да стане посилен“, порача Зеленски, повикувајќи на задржување на санкциите и на дополнителни испораки на противвоздушно оружје.
Украинскиот претседател се осврна и на можните мировни преговори, оставајќи простор за прекин на огнот долж сегашните линии на фронтот, како чекор кон запирање на борбите.
Но тој категорично ја отфрли можноста Украина формално да ги признае окупираните територии како дел од Русија или да се откаже од територии што сè уште ги контролира.
Зеленски нагласи дека територијалното прашање не се однесува само на границите, туку и на луѓето кои живеат на тие простори и на жртвите што Украина ги поднела во одбраната на својата независност.
Неговите пораки доаѓаат во момент кога американските дипломатски претставници продолжуваат со контакти со Москва и Киев за можен мировен договор, додека руските напади врз украинските градови и инфраструктурата продолжуваат.
