Оризопроизводителот Борче Ангелов од село Спанчево во Општина Чешиново-Облешево се уште не ја завршил жетвата на оризот, од шест хектари, еден хектар се уште не му е ожнеан, поради обилните врнежи и поплавите кон крајот на ноември. Причина за задоцнетата жетва е и касната сеидба на дел од површините, а какошто велат оризопроизводителите штетите се големи.
Оризовата арпа во моментов се откупува од 18 до 22 денари за килограм велат оризопроизводителите, а според нив не ги покрива ниту основните трошоци за производство. Тие бараат средба со ресорниот министер за да се направи калкулација за нова производна цена на оризовата арпа.
Временските прилики годинава не им одеа во прилог на кочанските оризопроизводители. Последните посеани хектари очекуваат да ги ожнеат до крајот на годината. Во овој регион ориз се произведува на површина од околу 4.000 хектари.
