Агенцијата за финансиска поддршка во земјоделството и руралниот развој денеска исплати повеќе од 217 милиони денари финансиска поддршка на вкупно 10.754 земјоделски производители кои се занимаваат со градинарско производство.
Вкупниот износ на исплатените средства изнесува 217.241.135 денари, а исплатата е реализирана преку мерката 1.3 за директни плаќања по обработлива земјоделска површина за градинарско производство и цвеќе, како на отворено, така и во пластеници.
За да ја остварат поддршката, земјоделските производители треба да располагаат со најмалку 0,2 хектари површина засадена со соодветните култури.
За производство на домати, пипер, краставици, корнишони, зелка, грав, компир, карфиол и морков, финансиската поддршка изнесува 30.000 денари по хектар.
За останатите култури опфатени со мерката, меѓу кои лубеница, диња, модар патлиџан, цвекло, тиква, кромид, боранија, грашок, кељ, лук, праз, тиквички, зелена салата, брокула, спанаќ, целер, пашканат, аспарагус и ротквици, поддршката изнесува 12.000 денари по хектар.
Од Агенцијата информираат дека средствата се исплатени согласно предвидените мерки за директни плаќања и се наменети за финансиска поддршка на земјоделските производители.
