Американските разузнавачки служби предупредуваат дека Русија би можела во следните години да се обиде да ја тестира цврстината на НАТО со ограничен напад врз една од членките на Алијансата. Според најновите проценки, сценаријата што ги разгледуваат американските власти вклучуваат кибер напади, саботажи или ограничена копнена операција со цел да се испита подготвеноста и реакцијата на сојузниците.
Проценките, објавени од „Волстрит џурнал“, доаѓаат во период на зголемени безбедносни тензии во светот, но и загриженост во Вашингтон поради намалените резерви на критична муниција во американската армија. Дел од залихите на САД беа пренасочени за поддршка на Украина по руската инвазија, а дополнителен притисок создаде и конфликтот со Иран.
Американските претставници сметаат дека Москва би можела да бара начин да ги искористи слабостите или поделбите во рамките на НАТО, додека Алијансата продолжува да ја зајакнува одбраната на своето источно крило. Иако не се тврди дека напад е неизбежен, предупредувањата отвораат нови прашања за идната безбедност на европските земји и подготвеноста на НАТО да одговори на можни закани.
Изворите велат дека залихите што се изложени на ризик вклучуваат прецизни ракети со долг дострел и тактички ракетни системи, како и ракети земја-воздух „Стингер“ со краток дострел.
Во извештајот се наведува дека претходно се сметало дека нема да има напад врз ниту една од членките на НАТО, со оглед на преокупацијата на Русија со војната во Украина, но новите прогнози на американските разузнавачки служби се слични на предупредувањата на одредени европски претставници во последните месеци.
Началникот на германската армија, генерал-потполковник Кристијан Фројдинг, во јуни предупреди дека Русија би можела да ги нападне земјите-членки на НАТО во следните три години, односно дека голем хибриден воен напад или дури и ограничен копнен упад би можел да се случи помеѓу есента оваа година и 2029 година.
Според извештаите, разузнавачките податоци укажуваат дека Русија би можела да се обиде да изврши и напади под „лажно знаме“, користејќи беспилотни летала произведени во Украина за напад врз критичната инфраструктура во Балтикот. Нападот најверојатно би бил насочен кон источното крило на НАТО со цел да се тестираат обврските на Алијансата според Член 5 – клаузулата за колективна одбрана за земјите-членки.
