Франција ќе ангажира 15.000 припадници на безбедносните сили за време на посетата на папата Лав XIV кон крајот на септември, а француските власти проценуваат дека, иако општата терористичка закана во земјата е сè уште висока, засега нема конкретни закани поврзани со доаѓањето на поглаварот на Римокатоличката црква.
Францускиот министер за внатрешни работи и за верски прашања, Лоран Нуњез, изјави за весникот „Ла Кроа“ дека на 25 и 26 септември, кога се очекува најголем број посетители, на терен ќе бидат распоредени полицајци, жандарми, припадници на мобилни единици и војници од операцијата „Сентинел“.
За здравствена безбедност, додаде тој, ќе бидат ангажирани околу 2.500 пожарникари од Париз, кои ќе соработуваат со цивилната заштита и со овластени организации, вклучувајќи ги Црвениот крст и Малтешкиот ред.
