Власта и опозицијата продолжуваат со спротивставени ставови околу успешноста на спроведувањето на Реформската агенда и искористувањето на средствата од Планот за раст на Европската Унија.
Од VMRO-DPMNE тврдат дека Македонија е препознаена како една од најуспешните земји во регионот во исполнувањето на реформските обврски, повикувајќи се на оценките на Европската комисија.
„Заедно со Албанија и Црна Гора, Македонија е препознаена како лидер во регионот според постигнатите резултати. Оценката на Европската комисија е јасен доказ дека државата се движи во правилна насока и дека реформите се препознаени од институцијата која единствено ги оценува нивниот квалитет и напредок“, се наведува во партиското соопштение.
Од владејачката партија додаваат дека Европската комисија предложила реалокација на средствата од Планот за раст, при што поголем дел од финансиската поддршка треба да биде насочен кон земјите што покажуваат најдобри резултати во спроведувањето на реформите.
Според ВМРО-ДПМНЕ, тоа претставува дополнителна потврда дека Македонија успешно ги реализира реформските процеси и ја зајакнува својата позиција на европскиот пат.
Од друга страна, опозициските партии остануваат критични кон оценките на Владата, обвинувајќи дека реформските процеси не се спроведуваат со очекуваното темпо и дека јавноста треба да биде целосно информирана за реалниот степен на исполнување на обврските од Реформската агенда.
Прашањето за реформите и средствата од Планот за раст останува една од темите околу кои власта и опозицијата имаат дијаметрално спротивни позиции, додека конечната оценка за напредокот на земјата се очекува да биде предмет на понатамошни анализи и извештаи на Европската комисија.
