Пазарите полни, во маркетите гужви, цените високи. Граѓаните ги прават последните подготовки за Велигден. Во споредба со лани забележале дека зголемени се цените на речиси сите производи, а во однос на другите години разликата велат е огромна. Поскапо се продава јагнешкото, но цените на овошјето и зеленчукот повторно рушат рекорди. Сепак, велат се обидуваат да обезбедат се што е потребно за велигденската трпеза.
-Скапо е, општо земено се е скапо секој купува колку може..
-Склапо е но зависи за кого како, во однос на лани се многу повисоки но што да се прави
-Повисоки се цените во однсо на лани, не успеавме се да обезбедиме.
Цените кај јајцата се различни, се движи од 7 до 10 денари за јајце. Некаде е и повисока. Килограм јагнешко пак чини речиси 600 денари.
По пазарите цената на пиперките достигнува и до 200 денари за килограм. Краставиците пак се продаваат и по 120 денари за килограм.
Цената за килограм домати достигнува и до 180 денари. Но, пазарџиите велат дека увозниот е поевтин од домашниот, со образложение дека тој е со помал квалитет.
Граѓаните веќе подолго време се борат со високи цени и скапотијата. Но, од друга страна интересно е што статистиката покажува намалување на инфлацијата.
Според, последните податоци, во март годинава во споредба со март лани , трошоците за живот се зголемени за околу 4 проценти. Ова е далеку пониско во однос на онаа што се случуваше лани. Но, граѓаните ваквиот пад не можат да го почувствуваат.
Последните бројки во статистиката покажуваат дека токму кај овошјето и зеленчукот има најголем раст на цените.
Но, тука се и месото, лебот и житата, шеќерот, кафето, чајот, чоколадите и кај другите прехрамбени производи.
Се поизвесно е дека наскоро граѓаните нема да се израдуваат на некое поевтинување. Според, бројките и светските цени растат веќе втор месец по ред.