Македонија

Скопскиот градоначалник Петре Шилегов како адвокат бил разочаран од тоа како се води истрагата за криминалната афера „Рекет“, а како политичар само еднаш се сликал со првоосомничениот во аферата Бојан Јовановски или Боки 13.

– Очекувам што е можно побрзо обвинителството да ја заврши истрагата ако има инволвирани или има сознанија, не е мое да се мешам. Јас сум човек кој откако сум влезен во политиката се залагам исклучиво за владеењето на правото. Ако мене ме прашувате, ќе мораше малку поинтензивно да си ја работат својата работа и Јавното обвинителство и судовите. Непринципиелно е да очекувате дека градоначалникот на Скопје, претседателот на Владата или министерот за внатрешни работи некого ќе затвора. Тоа е работа на јавните обвинителства и на судовите. За жал мојата констатација и како адвокат е дека не до крај совесно и не до крај одговорно ја завршија работата судовите и тука ќе треба да се позамисли секој од нас. Досега немаме достигнато високо ниво на професионалност ни во обвинителскиот систем. – вели Шилегов за ТВ Алфа.

На прашањето дали се фотографирал со Боки 13 и колку е близок со него, Шилегов одговори дека се сликал само еднаш.

– Во јавниот живот во нашата држава политичарите се најекспонирани. Секакви луѓе ни приоѓаат и со секакви луѓе се сликаме. Со Бојан Јовановски мислам дека имам една слика која беше на отворањето на телевизијата 1ТВ. И не мислам дека фотографија со било кого може да биде индиција за било што. – рече Шилегов.

Нема што да се додаде за утеха за разочараноста на Шилегов од правосудниот систем, кој како што рече, не ја заврши до крај професионалната улога околу „Рекет“. Но, ако е утешно, има најмалку уште две други фотографии на кои е сликан со Боки 13, кој со Зоки Кичеец и специјалната обвинителка Катица Јанева се во притвор во Шутка.

Предметот за Рашковски и за тендерот за набавка на радарска опрема е отворен по допрен глас по објавувањето на аудио снимка на една руска социјална мрежа на која се слуша и гласот на генералниот секретар на Владата како разговара со претставници на италијанската компанија „Леонардо“.

„По реакциите во јавноста во кои обвинителството се повикува да го расветли случајот со спорниот тендер за набавка на радарски систем, Основното јавно обвинителство за гонење на организиран криминал и корупција ја известува јавноста дека веднаш по објавената аудио-снимка е отворен предмет по допрен глас. Кон предметот е споена и кривичната пријава поднесена од ВМРО-ДПМНЕ, а во август јавен обвинител издаде наредба до МВР за прибирање на севкупната документација за предметот. По извршената темелна анализа ќе се донесе јавнообвинителска одлука за натамошниот тек на постапката“, се вели во соопштението.

На 5 август Државната комисија за спречување на корупцијата соопшти дека отвора предмет за јавната набавка за инсталација на радарскиот систем за управување со воздушниот сообраќај и за улогата во оваа набавка на генералниот секретар на Владата, Драги Рашковски.

Скандалот изби откако беше објавена снимка на која се слуша како генералниот секретар Рашковски договара детали за проектот вреден над 7 милиони евра и изборот на италијанската фирма „Леонардо“.

Во целиот овој случај е интересно тоа што целокупната постапка во врска со овој тендер била завршена од претходната влада. Изборот на компанијата „Леонардо“ бил завршен, Европската банка за обнова и развој (ЕБРД) која го финансира овој проект дала согласност, сите документи биле потпишани и градбата и инсталирањето на опремата требаше да почне уште во 2017 година. И тогаш и сега претседател на УО на М-НАВ беше Николче Тасески. Никој ништо не зборува за неговата улога кога веќе беше потпишан договорот со „Леонардо“, и потоа кога истиот човек се согласил да биде оспорен тој договор.

Една од причините за набавка на оваа ATM опрема беше и безбедноста во авио-сообраќајот. ATM-системот е примарен систем преку кој се остварува основаната услуга на М-НАВ, т.е. давање услуги на воздухопловна навигација во воздушниот простор над Македонија, со цел безбедно, редовно и ефикасно одвивање на воздушниот сообраќај. И тогашните власти биле согласни дека најсоодветна била понудата на „Леонардо“, а и актуелната власт нема ништо против опремата на оваа италијанска компанија.

Тогаш каде е проблемот? Зошто дојде до ретендерирање на овој проект претходно надгледуван и одобрен од ЕБРД? Тоа навистина е тешко да се одговори, а претпоставки за тоа има навистина многу. Се споменува маркицата за изградба на зграда за потребите на М-НАВ во кругот на скопскиот аеродром. „Владата побара вештачење дали административната зграда, која требаше да се гради како дел од тендерот, е со вредност од 1,8 милион евра или има некаква злоупотреба. Доколку тоа го утврдеше Бирото за судски вештачења, сакавме да се побара издвојување на таа компонента и М-НАВ да ја прави со свои пари за да се заштети од парите на граѓаните. Кога стигна таквото вештачење се виде дека вредноста е приближно 1,8 милион евра и не направивме ретендерирање за да не одолговлекуваме“, изјави Рашковски на 2 јули објаснувајќи зошто тој седел на преговорите со претставници на италијанската компанија „Леонардо“.

Наспроти ова, пак, се споменува и некаков документ во кој се вели дека такво вештачење и не е извршено заради „ненадлежност на Бирото за судски вештачења“.  

Прашањето за безбедноста на авио-сообраќајот го покрена и самиот Рашковски. Кога договорот беше потпишан во 2017 година, рокот за инсталирање на таа опрема беше две години. Тоа значи дека годинава ќе имавме нова радарска опрема и побезбеден авио-сообраќај.

Денес, септември 2019 година, немаме нова радарска опрема, произлегува дека немаме и безбеден авио-сообраќај, но имаме нова истрага.

Специјалниот претставник на државниот секретар на САД за Западен Балкан, Метју Палмер, вели дека очекува Северна Македонија да ги почне преговорите со Европската Унија во октомври.

„Се надеваме дека Северна Македонија ќе ги почне преговорите по Европскиот совет на 16 октомври“, изјави Палмер во интервју за Гласот на Америка.

Тој потсетува дека Европската комисија препорачала отворање на преговорите со Скопје во последните девет или 10 години по ред.

„На нашите европски партнери јасно им ја пренесовме нашата позиција. Сметаме дека (отпочнувањето на преговорите) би било многу корисно“, вели Палмер.

Северна Македонија, додава тој, се разбира може да помогне во својата кауза, продолжувајќи да ја следи агендата за реформи за спроведување на новиот закон за специјалното обвинителство.

„За тоа прашање во тек се консултативни преговори во Скопје. Ние би сакале да бидеме партнери со владата во Северна Македонија за поддршка на реформската агенда. Би сакале да ѝ помогнеме на таа земја да оди напред“, вели Палмер во интервјуто.

Тој додава дека САД се надеваат дека Северна Македонија ќе оди напред напред на патот на НАТО и дека идеално би било земјата да стане 30. членка на Алијансата во декември.

Истрагата во случајот Рекет е фарса, која има за цел да го одвлече вниманието на јавноста од Зоран Заев и врвот на власта, без кој милионскиот рекет и воопшто не би бил можен, реагираат од ВМРО-ДПМНЕ.

-Случајот е пријавен уште во април, по што требаше да се случи медиумски притисок за власта да се реши да жртвува две пипки од октопот, Боки 13 и Зоки Кичеец, само со цел заштита на Јанева и Заев. На Јанева смислено и беше оставен 1 месец откако беа уапсени Боки 13 и Зоки Кичеец, за истата да има доволно време да сокрива докази и да влијае врз сведоци и истрагата, како би се уништиле трагите кои водат кон неа к кон главата на октоподот – Зоран Заев. После месец дена откако Јанева е во притвор, истрагатa тапка во место. Нови приведени нема. Има само најави од владата за формирање тим и наводна акција на УЈП со задоцнување од три месеци, се наведува во партиското соопштение.

Од ВМРО-ДПМНЕ прашуваат: „Што е тоа што Русковска и Заев не сакаат граѓаните да го дознаат“?

-Дали се работи за тоа каде завршувале парите и за што тие биле трошени!? Дали се крие дека можеби парите завршиле на Илинденска и со нив е финансирана кампањата на Стево Пендаровски!? ЈО со ваквиот начин на работа само дополнително се компромитира. Граѓаните очекуваат ефективна и ефикасна истрага. Импровизации на сметка на правната држава не смее да има. Никој, па ни Заев не смее да биде поштеден. За нормално функционирање на државата потребен е пад на оваа власт. Потребни се предвремени парламентарни избори час поскоро, посочуваат од ВМРО-ДПМНЕ.