Регион

Нашата држава, тогаш, не само што се покажа неспособна да заштити толку животи и имоти, за жал дури и сега се покажува неспособна да ги затвори големите рани, рече грчкиот премиер Кирјакос Мицотакис на крајот од неговиот говор за време на расправата во парламентот за гласање доверба, осврнувајќи се на ланската трагедија во Мати по катастрофалните пожари и најави низа мерки, јави дописничката на МИА од Атина.

Претседателот на владата на Грција рече дека сега имаат целосна слика за ситуацијата и објасни дека на специјалната сметка што лани владата ја отвори за помош на настраданите биле собрани 37,8 милиони евра од 2.770 физички и правни листа. Од овој износ, сега на сметката има 31 милион, а првите исплати биле кусо пред изборите. Од 475 објекти за рушење, биле урнати само 61, од 2.430 барања за обнова, биле издадени одлуки за само 440.

-Нашиот одговор сака да изрази почит во спомен на 102-те жртви. Да им се даде суштинска помош на жртвите и да се научи од грешките од минатото. Но, најважно, да се испрати пораката дека државата може да функционира поинаку, рече Мицотакис најавувајќи ги итните мерки.

Со владина одлука што ќе треба да ја потпише претседателот на државата на централната управа ќе и се даде можност да реагира во услови на природни катастрофи, а тоа ќе дозволи и непосредни чекори за користење на парите од специјалната сметка. Мицотакис најави дека веднаш ќе биде исчистен плацот на кој се собрани сите изгорени дрва.

Рече дека ќе се формира граѓанска невладина организација во која свои претставници ќе имаат волонтерите од локалното население, државниот трезор, Банката на Грција, Техничката комора, министерствата за животна средина и инфраструктура и генералниот секретар на владата, а целта ќе биде да се направи акционен план за обновување населбите зафатени од пожарот.

Мицотакис рече дека Министерството за здравство веќе се погрижило за 58-те лица кои се здобија со тешки изгореници во пожарот, бесплатно да имаат пристап не само до лекови, туку и до лекарска помош.

-Немаат само изгореници што ќе ги следат цел живот, имаат и големи лузни во душите. И минимум што можеме да направиме е со неколку едноставни чекори да ги поддржиме и да им кажеме дека имаат право повторно да се надеваат повторно да ги средат нивните животи, рече Мицотакис за време на неговиот синоќешен говор во Парламентот.

Рано утрово, грчкиот премиер присуствуваше на литургија во црква во Мати во спомена на жртвите од катастрофалниот пожар на 23 јули 2018.

Турскиот министер за надворешни работи Мевлут Чавушоглу изјави дека Анкара сака да ги подобри односите со Грција и да усвои пакет-аранжман на односите, кои ќе ги вклучуваат и односите меѓу двете земји во Егејското Море и на источниот Медитеран, според грчкиот весник Катимерини.

Чавушоглу изјави дека во источниот Медитеран не се потребни понатамошни истражувања или бушења кои Турција ги спроведува веќе некое време, но додаде дека Турција нема да дозволи никој да ги оспорува нејзините суверени права во таа област.

Новиот грчки министер за надворешни работи, Никос Дендиас, во грчкиот парламент рече дека Грција нема да ги толерира заканите од војна со провокативни дејства и еднострани барања, но во исто време ќе промовира политика на добрососедски односи и почитување на меѓународното право и договори.

Што се однесува до Кипар, Дендиас истакна дека условот за продолжување на разговорите за повторно обединување на островот е Турција да го запре нелегалното бушење и истражување на брегот на островот, како и да ги отстрани своите бродови од ексклузивната економска зона околу Кипар.

РЕГИОНХрватска гради складиштe за нуклеарен отпад на границата со БиХОбјавено пред 2 часа – 22 јули, 2019Од Макфакс

Хрватска одлучи да почне со изградба на своe складиште за депонирање нуклеарен отпад во Трговска Гора во Сисачко-мословачката Жупанија, во близина на границата со БиХ, иако одлуката за тоа дали Хрватска и Словенија ќе го одлагаат отпадот од централата „Кршко“ во заеднички склад ќе биде објавена во септември, пренесува хрватскиот портал „Експрес“.

Словенија веќе неколку години планира да изгради заедничко складиште за ниско и средноактивен нуклеарен отпад од централата „Кршко“ во Врбина кај Кршко и се залага за влез на Хрватска во проектот.

Хрватска и Словенија имаат обврска до 2023 година да го згрижат својот дел од отпадот од нуклеарната централа Кршко, која е заедничка.

И покрај тоа што Хрватска има само четири години за подготвка и изградба на складиштeто, сè уште не е направена студија за влијанието врз животната средина и воопшто не е јасно како државата планира да го подготви преземањето на нуклеарен отпад за толку кратко време, вели „Експрес“.

Порталот додава дека ниту еден консензус не е постигнат со локалното население и со БиХ, кои силно се противат на депонирањето на отпадот во Трговска Гора.

Кршко функционира од 1981 година и ќе работи до 2043 година.

Дирекцијата на грчката Противпожарна служба за справување со криминал со подметнување пожари, вчера уапси 64-годишен маж под сомнение дека од небрежност го предизвикал пожарот во Мегара, предградие во западниот дел на областа Атика, јави дописничката на МИА од Атина.

Од Противпожарната служба на Грција соопштуваат дека за уапсениот веќе е известен јавен обвинител и потсетуваат на мерките и упатствата што треба да ги следат граѓаните за периодот во кој постои опасност од пожари.

Вчерашниот пожар во Мегара, изби кусо по 13 часот, а попладнето беше ставен под контрола.

Во гаснењето учествуваат 51 пожарникар, 19 возила, членови на специјализираната противпожарна бригада, еден пешадиски тим и два хеликоптери, а генералниот секретар за цивилна заштита, Никос Хардаљас итно замина во предградието, кусо откако изби пожарот.

Парламентот на Грција вечерва ќе гласа за доверба на новата влада, откако претходно расправата, со обраќање, ќе ја заврши грчкиот премиер Кирјакос Мицотакис.

Кусо пред 10 часот започна третиот и последен ден од расправата, а се очекува збор да земат пратеници од сите партии, како и министри и заменици во владата, меѓу кои и шефот на грчката дипломатија, Никос Дендиас, јави дописничката на МИА од Атина.

Расправата најавено е да заврши околу полноќ, иако доколку говорниците строго се држат до времето за обраќање може тоа да се случи и порано.

На обраќањето на Мицотакис, ќе му претходат говори на лидерите на политичките партии што на изборите на 7 јули обезбедија место во Парламентот.

Според досега изнесените јавни ставови, грчката Влада ќе добие доверба само од пратениците на Нова демократија.

Расправата почна во петокот попладне со говор на Кирјакос Мицотакис, а по него следеа претседателите на партиите. Во изминатите два дена, министри, заменици министри и пратеници од владејачката партија ги презентираа приоритетите и стратешките цели на новата влада.

Независноста на Косово е легитимна и правична, а државата денес е посилна од кога и да е, порача косовскиот премиер во заминување Рамуш Харадинај, на деветтата годишнина од пресудата на Меѓународниот суд за правда.

Тој потсети дека на 21 јули 2010 година, еден ден пред историската одлука на МСП за независност на Косово, тој беше повикан на вториот процес против него од Хашкиот Трибунал за воени злосторства во поранешна Југославија.

– За коинциденција, еден ден пред одлуката на МСП, на 21 јули, јас бев повикан во Хаг на вториот судски процес. Денес, кога повторно сум повикан во Хаг, на оваа деветта годишнина, Косово е посилно од кога и да е, како независна, суверена, демократска, единствена и неделива држава и е посветено на својот евро-атлантски пат – порача Харадинај, кој во петокот поднесе оставка од функцијата поради повикот од МСП.

Меѓународниот суд за правда, чие седиште е исто така во Хаг, е главниот судски орган на Обединетите нации. Основан е во 1945 година според одредбите на Повелбата на ОН.

Советникот на американскиот претседател за национална безбедност Џон Болтон, во разговор со првиот потпретседател на Владата на Србија и министер за надворешни работи Ивица Дачиќ, ја потенцира одлучноста на актуелната администрација на САД да го поддржи продолжувањето на дијалогот помеѓу Белград и Приштина, што се води под покровителство на Високиот претставник на ЕУ за надворешна политика, пренесува Танјуг.

– За време на вчерашните разговори во Вашингтон, на маргините на Министерската конференција посветена на верските слободи, министерот Дачиќ се заложи за натамошно зајакнување на билатералните односи со Соединетите Американски Држави и нивно подигнување на повисоко ниво, особено имајќи го предвид сојузништвото на двете земји во двете светски војни, соопшти Министерството за надворешни работи на Србија.

Болтон се согласил со оценката на Дачиќ за неопходноста од натамошно унапредување на билатералните односи на сите нивоа и ја истакнал решеноста на актуелната администрација на САД за поддршка на што поскоро продолжување на дијалогот помеѓу Белград и Приштина.

Седум лица се водат за исчезнати по поројните дождови што ја зафатија северозападна Турција во последните денови.

Циклонот, кој помина над Грција, погоди неколку села источно од Истанбул, јави агенцијата Анадолија.

Поради поплавените патишта и свлечишта, неколку населени места и повеќе од 4.000 луѓе моментално се целосно отсечени.

Претседателите на Србија и на Франција, Александар Вучиќ и Емануел Макрон, усвоија заедничка изјава за време на посетата на Макрон на Србија, јави дописникот на МИА од Белград.

Во изјавата, „се истакнува дека пристапот на Србија кон претходно длабоко реформираната ЕУ претставува заедничка стратешка цел” и се потврдува заедничката заложба за демократските вредности и човековите права, владеењето на правото и мултилатерализмот.

Изјавата, која беше објавена попладнето од страна на Кабинетот на претседателот на Србија, Макрон и Вучиќ се согласија да продолжат со спроведувањето на „Договорот за стратешко партнерство и соработка” од 2011 година, да го продолжат политичкиот дијалог на високо ниво и да ја зајакнат билатералната соработка.

Во Заедничката изјава, во која дописникот на МИА од Белград имаше увид, има 5 поглавја за продолжување на дијалогот на високо ниво, јакнење на соработката во областа на безбедноста и одбраната, промоција на културната размена и Франкофонијата, поддршката на интеграцијата на Србија во ЕУ и јакнење на економските односи, меѓу останатото се наведува дека „двајцата државници истакнаа дека пристапот на Србија во длабоко реформираната Европска унија (ЕУ) претставува заедничка стратешка цел”. Покрај неопходните економски реформи во кои Србија покажува значителен напредок, двајцата државници ја истакнаа потребата од поголеми напори во областите на владеењето на правото, основните права, јакнењето на демократските институции и реформата на јавната администрација. Тие се согласија дека билатералните несогласувања треба да се решат и преку билатерални преговори, во согласност со меѓународното право и со добра намера. Тие изразија желба брзо да се стекнат услови за обновување на дијалогот помеѓу Белград и Приштина, со цел постигнување взаемно прифатливо решение со посредство на ЕУ.

Во Заедничката изјава меѓу останатото се наведува дека „Србија и Франција ќе го зајакнат нивното заедничко учество во надворешните операции и мисии на Европската унија и Обединетите нации….и ќе го зајакнат својот политичко-стратешки дијалог, одбранбените врски, особено во областа на обуката, како и нивната соработка во областа на вооружувањето, вклучувајќи го и партнерството во одбранбените индустрии.”

Франција ќе продолжи да ја поддржува Србија на нејзиниот пат кон пристапувањето во Европската унија.

Франција е подготвена да и обезбеди на Србија техничка експертиза во областа на реформата на јавната администрација, економското управување, животната средина, земјоделството и транспортот, како и во која било друга област за која Србија би изразила интерес. Оваа поддршка веќе се спроведува преку институционална соработка и престојот на францускиот експерт во областа на економските реформи во српското Министерство за европски интеграции, се наведува меѓу останатото во сопштението од Заедничката изјава на Вучиќ и Макрон, објавена два дена по заминувањето на францускиот претседател од Белград.

Претседателот на косовскиот Парламент, Кадри Весели изјави дека ја поддржува идејата за времена суспензија на воведените 100 процентни такси на производите од Србија, со цел да се отвори пат за продолжување на дијалогот, потенцирајќи дека суспензијата не може да биде вечна.
Тој во интервју за „Глас на Америка“ истакна дека решение за косовското прашање гледа во српското признавање на косовската независност, како „суверена држава Косово во рамки на постоечките граници“.

За возврат, како што вели тој, „Косово ќе ја признае државата Србија“. Весели тоа го гледа како „нова ера, ера на соработка и комуникација“.

– Тоа ќе ни олесни и нам и на Србија, две децении по ослободувањето на Косово. Србија точно знае дека го загубила Косово, нагласи Весели, оценувајќи дека меѓународната заедница мора да и помогне на Србија да ја прифати таквата реалност.

Претседателот на косовскиот Парламент истакна дека „ќе се седне со Србија на преговарачка маса тогаш кога ќе ни кажат САД“.

– Но ние нема да прифатиме каков било договор кој го крши нашиот суверенитет и територијален интегритет, наведува Весели, потврдувајќи дека околу прашањето за таксите на српските производи и дијалогот со Белград внатре во владејачката коалиција постојат концептуални разлики.