Вашингтон разгледува механизам според кој Москва би ослободила политички затвореници во замена за ублажување на американските санкции кон Русија – потег што би можел да го отвори патот за обновување на одредени трговски односи, објави магазинот „Атлантик“.
Иницијативата му ја предложил на американскиот претседател Доналд Трамп неговиот пратеник Џон Кол, кој претходно преговарал со Белорусија за ослободување стотици притвореници во замена за олеснување на санкциите.
Американскиот претседател наводно се согласил да се обиде со сличен пристап и со рускиот претседател Владимир Путин. Проектот, кој е сè уште во рана фаза, би можел да ги олесни трансакциите поврзани со руска нафта, дизел или ретки минерали.
Ваквиот пристап би им овозможил на американските преговарачи повторно да воспостават одредени економски врски со Москва без да чекаат да заврши војната во Украина, пренесе „Атлантик“.
Кол смета дека проширувањето на економската соработка би можело да помогне во намалувањето на тензиите и да поттикне прекин на огнот.
Киев се противи на какво било ублажување на санкциите пред крајот на војната.
Украинскиот претседател Володимир Зеленски изјави за магазинот дека ќе се обиде да го „блокира“ таквиот развој на настаните, сметајќи дека за Украина би било тешко да се носи со економската моќ на Русија. Минатата недела, обраќајќи се пред ОН, Зеленски ги повика западните земји всушност да ги заострат санкциите против Москва.
Во меѓувреме, американските преговарачи разгледуваат можност за нова средба со руски и украински претставници во октомври – веројатно во Абу Даби – фокусирана на ограничен прекин на огнот, вклучително и забрана за напади врз енергетската инфраструктура.
Посебен договор, посредуван од Египет, би се однесувал на прекин на нападите врз трговските бродови во Црното Море, особено оние што превезуваат пченица, според двајца украински преговарачи цитирани од американскиот магазин.
„Атлантик“ додава дека оваа нова стратегија претходно не била јавно објавена и дека значителен дел од извештајот се заснова на разговори со Кол, американски официјални лица и украински преговарачи, пренесе „Бета“.
