Македонските аеродроми бележат најбрз раст во регионот според бројот на патници, а зголемувањето на воздушниот сообраќај е резултат на политиките и активностите преземени во изминатите 25 месеци, изјави премиерот Христијан Мицкоски. Тој посочи дека податоците за растот на бројот на летови и патници покажуваат значително зголемување во споредба со минатата година.
Бројот на летови и бројот на патници во првите седум месеци веќе не е зголемен за еден, два или три проценти, туку за 20, 30 или 40 проценти- рече Мицкоски.
Според него, податоците доставени од операторот на двата меѓународни аеродрома, како и од Министерството за транспорт, покажуваат дека македонските аеродроми се меѓу најбрзорастечките во регионот.
-Ова е добра вест за граѓаните и за сите оние кои ѝ мислат добро на државата, бидејќи тоа што го работиме 25 месеци полека се консолидира и покажува знаци на отпорност на кризите со кои се соочувавме. Резултатите стануваат сè повидливи- изјави премиерот.
Мицкоски нагласи дека растот на воздушниот сообраќај е значаен за развојот на туризмот, кој, како што рече, е еден од приоритетите на Владата.
-Зголемениот број летови и патници нè мотивира да продолжиме во таа насока. Туризмот е еден од приоритетите, а сведоци сме што се случува овие денови и недели со нашиот туристички бисер, но и со туристичките места низ целата држава- додаде тој.
Владата, според премиерот, ќе продолжи со активности насочени кон подобрување на инфраструктурата и создавање услови за дополнителен развој на туризмот и економијата.
