Кандидатот за градоначалник на Прилеп, Проданоски најави дека еден од клучните приоритети во неговата програма ќе биде целосното уредување и осветлување на локалитетот Маркови Кули, со што овој историски симбол ќе добие нов, модерен и привлечен изглед.
„Маркови Кули е срцето на Прилеп и симбол кој ја претставува нашата историја и традиција. Со новото осветлување, уредени пешачки патеки и пристапна инфраструктура, ќе го направиме овој локалитет достоен за посетителите од целата земја и од странство,“ изјави Проданоски.
Проектот предвидува уредување на патеките што водат кон тврдината, поставување нов систем на LED осветлување, уредени зони за одмор и видиковци, како и заштита на природната средина околу локалитетот. Проданоски истакна дека целта е Маркови Кули да стане централна туристичка атракција на Прилеп и да ја зголеми посетеноста на градот.
„Прилеп има уникатен потенцијал што не е доволно искористен. Со овој проект, ќе ја заживееме туристичката понуда, ќе ги охрабриме инвеститорите во туризмот и ќе создадеме нови можности за локалната економија,“ додаде Проданоски.
Како дел од визијата за развој на Прилеп, Проданоски најави и иницијатива за промоција на културно-историските знаменитости, вклучувајќи ги манастирите во регионот, старите прилепски куќи и традиционалните занаети. Тој истакна дека со современ пристап и професионална презентација, Прилеп може да се претвори во вистински туристички бренд на Македонија.
„Ова не е само проект за осветлување, туку за оживување на духот на Прилеп. Ќе покажеме дека можеме да го споиме старото и модерното – историјата и иднината,“ рече Проданоски.
