Проценката на нутритивната средина во училиштата, спроведена во соработка со Министерството за образование и наука, Министерството за здравство и Институтот за јавно здравје, со поддршка од УНИЦЕФ, ја претставува првата сеопфатна национална анализа на нутритивната средина во училиштата во Северна Македонија. Опфаќајќи 40 училишта и користејќи ја методологијата NEAT-S, проценката ја анализира достапноста на храна, условите за физичка активност, нутритивното образование и услугите за поддршка на учениците.
Проценката открива значајни позитивни аспекти, но и долготрајни предизвици кои влијаат врз пристапот на учениците до здрава храна и можностите за здрав живот. Иако дел од училиштата располагаат со инфраструктура што поддржува здрава исхрана и физичка активност, целокупната средина се карактеризира со ограничена понуда на здрави оброци и ужини, широка достапност на нездрава храна и нерамномерен пристап до нутритивно образование и услуги за поддршка. Доминацијата на нездрави избори на храна во и околу училиштата, како и недостигот од политики што би ги ограничиле, продолжуваат да ги поткопуваат напорите за поттикнување здрави навики во исхраната. Нутритивното образование и системите за упатување и поддршка сè уште не се системски интегрирани во образовниот систем, а учениците јасно изразуваат потреба од подобрувања во овие области.
За надминување на овие предизвици, се препорачуваат силни законски мерки, инвестиции во универзални здрави училишни оброци, проширување на нутритивното образование спроведувано од обучени професионалци и воведување рестриктивни политики за нездрава храна и маркетинг. Соработката меѓу различни сектори и активното вклучување на училиштата, здравствените служби, семејствата и локалните производители на храна се клучни за создавање поддржувачка и одржлива училишна средина.
https://www.unicef.org/northmacedonia/mk/izvestai/procenka-na-nutritivnata-sredina-vo-ucilistata-vo-severna-makedonija
