Најновото истражување на Евробарометар покажува дека 56 проценти од граѓаните на Европската унија поддржуваат понатамошно проширување на Унијата. Најголема поддршка доаѓа од северните земји, додека жителите на централна Европа покажуваат значително поголема воздржаност кон ова прашање.
Според податоците, Шведска (79%), Данска (75%) и Литванија (74%) се на врвот на листата на земји кои најмногу го поддржуваат проширувањето, додека Австрија (45%), Чешка (43%) и Франција (43%) се меѓу најскептичните членки.
Како што пренесува „Евронјуз“, младите Европејци се најголемиот двигател на позитивниот став кон проширувањето. Во возрасната група од 15 до 24 години, дури 67 проценти го поддржуваат приемот на нови земји, а кај групата од 25 до 39 години, поддршката изнесува 63 проценти.
„Поддршката најчесто доаѓа од младите и образованите луѓе – што не е изненадување. Тие најчесто имаат пошироко разбирање и подготвеност за европски иницијативи,“ изјави Корина Стратулат, заменичка директор на Европскиот политички центар.
Истражувањето открива дека 37 проценти од анкетираните сметаат дека проширувањето ќе ја засили улогата на ЕУ во светот, а исто толку дека ќе го засили европскиот пазар. Околу 30 проценти веруваат дека овој процес ќе придонесе за поголема солидарност меѓу земјите-членки.
Но, не недостасуваат ниту загрижености: 40 проценти од граѓаните стравуваат од неконтролирана миграција, 39 проценти укажуваат на ризик од корупција и криминал, додека 37 проценти се загрижени за финансискиот товар што би можел да падне врз европските даночни обврзници.
За да биде процесот успешен, 44 проценти од испитаниците сметаат дека проширувањето мора да биде придружено со засилени механизми за владеење на правото и борба против корупцијата. Дополнително, 38 проценти бараат од земјите-кандидати јасни обврски за спроведување на реформите пред влез во Унијата.
„Би било добро политичарите да го искористат овој бран на јавна поддршка за да бидат поамбициозни и навистина да преземат конкретни чекори кон прием на нови членки,“ нагласува Стратулат.
Европјаните, според Евробарометар, во сè поголем број ја поддржуваат идејата за посилна и поширока Унија – но и очекуваат дека секое ново проширување мора да биде внимателно, одговорно и врз здрави демократски темели.
