Во меѓународна полициска операција, во која учествувале и македонските надлежни органи, разбиена е криминална мрежа осомничена за инвестициски измами преку интернет. Уапсени се седум лица, извршени се претреси на 17 локации и запленети се повеќе од 100 сервери. Досега утврдената финансиска штета надминува четири милиони евра, а потенцијални жртви се идентификувани во најмалку 50 држави, соопшти Основното јавно обвинителство за гонење организиран криминал и корупција.
Операцијата била спроведена со поддршка и координација на Европол и Европравда, во соработка со надлежните органи на Германија, Кипар, Финска, Албанија, Израел, Косово и Македонија.
Според соопштението на Европравда, измамниците користеле интернет-платформи за тргување што изгледале легитимно и им ветувале на граѓаните огромна заработка за краток период преку вложувања во криптовалути, девизи и акции.
Откако жртвите ќе вложеле помала сума пари, на платформите им биле прикажувани лажно зголемени добивки за да се убедат да инвестираат повеќе. Потоа, наводните брокери вршеле психолошки притисок врз нив да уплаќаат поголеми износи. Кога жртвите ќе побарале да ги повлечат парите, измамниците користеле различни изговори за да го одложат исплаќањето, по што исчезнувале.
Истрагата започнала во 2022 година, откако брачна двојка од Германија пријавила дека ги вложила своите заштеди преку интернет-платформа, но не можела да ја повлече заработката.
Во претходните меѓународни акции, спроведени во 2022 и 2025 година, биле уапсени осомничени лица и биле запленети докази што овозможиле продолжување на истрагата.
Анализата на доказите довела до откривање компанија со седиште во Кипар и Израел, за која постои сомневање дека им обезбедувала на различни криминални групи лажни интернет-страници за спроведување измами.
Меѓу осомничените клиенти на компанијата биле идентификувани лица во Албанија, Косово и Македонија, за кои постои сомневање дека управувале со измамнички телефонски центри.
Во последната операција биле претресени 17 локации, меѓу кои и телефонски центар во Косово. Запленети се повеќе од 100 сервери, електронски докази и други средства поврзани со криминалните активности. Седумте осомничени биле уапсени заради предавање или екстрадиција во Германија.
Од македонска страна во акцијата учествувале Основното јавно обвинителство за гонење организиран криминал и корупција и Одделот за сузбивање организиран и сериозен криминал при Бирото за јавна безбедност.
