Ријана повторно го привлече вниманието на јавноста, овојпат со новата кампања за нејзиниот бренд долна облека Savage X Fenty. Пејачката лично ги претстави новите парчиња од колекцијата за 2026 година, а нејзините фотографии и видео веднаш предизвикаа бројни реакции на социјалните мрежи.
Во еден од највпечатливите видеа, 38-годишната Ријана позира во црн градник и гаќички со бели чипкани детали, со подвезици, проѕирни црни чорапи и високи потпетици. Таа во слично издание се фотографираше и кон крајот на јули, кога на своите следбеници им порача дека тоа е знак да се почестат со ново парче од Savage X Fenty.
Фановите веднаш се огласија со комплименти за изгледот на пејачката.
Ријана во видеото позираше покрај сообраќајни знаци, меѓу кои и знакот „stop“, па дел од обожавателите го претворија ова во шега на нејзина сметка. Побараа од неа конечно да престане да ги „мачи“ и да го објави долгоочекуваниот деветти албум, познат како R9.
– Ова е знак за тебе да го објавиш албумот и да престанеш да си играш со нас – напиша една обожавателка.
Иако Ријана во последните години повеќе се посвети на своите бизниси, приказната со новиот албум повторно се раздвижи во 2026 година. Пејачката нема објавено студиски албум по „Anti“ од 2016 година, но во февруари сподели видео од доцна ноќна посета на студио. На снимката се гледа како работи на музика околу 2 часот по полноќ, што повторно ги разгоре шпекулациите дека R9 конечно се приближува.
Ријана претходно откри дека за новиот албум долго време се обидувала да го пронајде вистинскиот правец. Во интервју за „Harper’s Bazaar“ вели дека конечно го „скршила кодот“ за новиот звук, но подоцна објаснила дека проектот нема да биде онаков каков што очекуваат фановите. Таа се откажа и од идејата албумот да биде строго реге, бидејќи смета дека тоа повеќе не одговара на нејзиниот развој како артист.
– По осум години чекање, подобро е да почекате уште малку – изјави Ријана, објаснувајќи дека не сака да објави нешто просечно само затоа што публиката долго го очекува. Таа најави дека новата музика нема да биде ниту она што луѓето го очекуваат, ниту нужно комерцијална и прилагодена за радио.
Во меѓувреме, Ријана продолжува активно да го гради својот деловен свет. Savage X Fenty останува еден од главните брендови во нејзината империја, а новите колекции редовно ги промовира лично. И во август таа продолжи со кампањата, во која покрај долната облека го користи и препознатливиот провокативен визуелен стил на брендот.
Нејзиното последно појавување на сцена, пак, им даде дополнителна надеж на фановите. Во јули Ријана неочекувано се појави на концертот на Џеј Зи на „Yankee Stadium“ во Њујорк и заедно со него ја отпеа „Run This Town“, признавајќи пред публиката дека е „зарѓана“ бидејќи долго време не настапувала.
