Чудо во Лаос се случи по 10 дена драматична потрага под земја, кога петмина мажи беа извлечени живи од поплавена пештера во провинцијата Ксаисомбоун, додека спасувачките тимови сè уште трагаат по уште двајца исчезнати.
Драмата почнала на 20 мај, кога група локални жители влегла во пештерата, на околу 120 километри северно од главниот град Виентијан, во потрага по злато и вредни минерали. Обилните дождови брзо ја претвориле пештерата во подземна стапица, со поплавени премини, одрони и блокиран излез.
Еден човек успеал да излезе и да ги алармира властите дека во внатрешноста останале седуммина. Од тој момент почнала сложена спасувачка операција во тесни, калливи и опасни тунели, со речиси нулта видливост и постојан ризик од ново покачување на водата.
На 26 мај спасувачите успеале да се приближат до делот од пештерата каде што се верувало дека се заробените. Тогаш веќе во операцијата биле вклучени локални тимови, спасувачи од Тајланд и меѓународни специјалисти за пештерско нуркање.
На 27 мај стигнала првата голема надеж: петмина од исчезнатите биле пронајдени живи, свиткани на карпеста полица во пештерата, околу 300 метри од влезот. Биле исцрпени, гладни и ослабени, но живи. Спасувачите им доставиле вода, храна и ќебиња, додека потрагата по уште двајца продолжила.
На 29 мај бил извлечен првиот преживеан. Снимките од операцијата покажале човек покриен со кал, со ламба на главата, како излегува од тесниот премин со помош на нуркачите. Ден подоцна следувал најважниот пресврт: и преостанатите четворица што биле пронајдени живи успеале да излезат од пештерата.
Во спасувањето учествувале тимови од Лаос и Тајланд, како и специјалисти од Јапонија, Малезија, Индонезија, Франција и Австралија. Дел од нив имале искуство и од големата спасувачка операција во Тајланд во 2018 година, кога млад фудбалски тим беше извлечен од поплавена пештера.
За петмината преживеани, оваа драма заврши како приказна за неверојатна издржливост и спасување во последен момент. Но, случајот во Лаос сè уште не е затворен, бидејќи двајца мажи и натаму се водат како исчезнати, а спасувачите продолжуваат да ги пребаруваат подлабоките и поопасни делови од пештерата.
