Коалицијата ВЛЕН денеска преку соопштение побара одговори за, како што наведуваат, одолговлекувањето на случајот поврзан со поранешниот функционер Артан Груби, оценувајќи дека јавноста има право на поголема транспарентност и побрзо институционално постапување.
Од ВЛЕН посочуваат дека Груби, кој со години беше еден од најистакнатите функционери во ДУИ, се споменува во предметот „Државна лотарија“, каде заедно со Перпарим Бајрами се сомничи за злоупотреби во вредност од околу осум милиони евра.
Според партијата, станува збор за предмет кој, како што наведуваат, отвора сериозни прашања за начинот на функционирање на институциите и односите меѓу политиката и бизнисот.
„Се поставува прашањето кој има интерес случајот да се движи бавно и дали некој се обидува да спречи целосно расветлување на фактите“, наведуваат од ВЛЕН.
Во соопштението тие го споменуваат и името на Ислам Абази, потсетувајќи на претходни јавни информации и прашања поврзани со вработување на лице кое, според нив, било блиско поврзано со него, а подоцна префрлено во АЕК.
Од ВЛЕН бараат институциите целосно да го расчистат случајот и нагласуваат дека, според нив, предметот не смее да остане без правна разрешница.
„Секое одложување на правдата дополнително ја намалува довербата на граѓаните во институциите и испраќа лоша порака во процесите поврзани со европските интеграции“, се наведува во реакцијата.
Случајот „Државна лотарија“ останува во фокусот на јавноста, а надлежните институции засега не соопштија нови детали околу натамошниот тек на постапката.
