Полицијата во североисточниот дел на Демократска Република Конго испука предупредувачки истрели и употреби солзавец за да ги растера демонстрантите кои одбија да дозволат безбеден погреб за фудбалер за кој се сомневаше дека има ебола, соопштија сведоци и полицијата.
Инцидентот се случил во градот Рвампара во покраината Итури, каде што е во тек голема епидемија на сојот на ебола Бундибугјо, за кој не постои одобрена вакцина или лек.
Семејството, пријателите и соседите на познатиот локален фудбалер Ели Мунонг Вангу се собраа пред болница барајќи неговото тело да биде однесено и погребано на традиционален начин. Мајката на починатиот рече дека верува оти нејзиниот син починал од тифус, а не од ебола.
Кога властите инсистираа на безбеден погреб, толпата запали два шатори што ѝ припаѓаа на организацијата за медицинска помош АЛИМА, кои содржеа осум кревети за пациенти. Пожарот го уништи и телото на еден од починатите кој требаше да биде погребан тој ден. Шест пациенти кои беа лекувани во шатори беа префрлени во болницата.
Полицискиот службеник Жан-Клод Мукенди изјави дека немирите биле предизвикани од „млади луѓе кои не ја разбираат сериозноста на болеста“, објави Ројтерс.
Телата на жртвите од ебола се многу заразни, а небезбедните погреби се еден од главните начини на ширење на вирусот. Епидемијата е веќе трета по големина во историјата на Конго, со 670 сомнителни случаи и 160 сомнителни смртни случаи.
Властите започнаа со следење на контактите и бараат сите пациенти кои избегале за време на немирите.
