Претставникот на Владата Изет Меџити присуствуваше на Саемот на книга во Скопје, каде што се сретна со младите од општина Чаир, истакнувајќи ја важноста на ваквите настани за поттикнување на младинскиот активизам и културниот развој.
Тој нагласи дека е особено задоволство кога, како што рече, „републиката на идеи“ се спојува со енергијата и ентузијазмот на младите, создавајќи простор за нови перспективи и иницијативи.
Саемот на книга, кој се одржува од 23 до 29 април во арената „Борис Трајковски“, годинава обедини околу 65 издавачки куќи од земјата и странство. Посетителите имаат можност да се запознаат со нови наслови, автори, како и да учествуваат во различни културни и професионални активности.
Меџити посочи дека ваквите настани имаат значајна улога во збогатување на културниот живот во Скопје, отворајќи нови хоризонти и идеи кои ги поврзуваат граѓаните.
Саемот продолжува да привлекува голем број посетители, особено млади, кои преку книгата и знаењето наоѓаат инспирација за личен и општествен развој.
