Во храмот Св. Благовештение во Прилеп беше отслужена Божествена литургија по повод празникот на Светите Три Светители – Јован Златоуст, Василиј Велики и Григориј Богослов, во народот познат и како Ден на бакалите. На литургијата присуствуваше и градоначалникот на Прилеп, Дејан Проданоски.
Со богослужбата чиноначалствуваше Петар, Митрополит Преспанско-пелагониски и администратор Австралиски и Новозеландски, во сослужение со Климент, Епископ Хераклејски, и Никола, Епископ Велички.
По повод празникот, Проданоски истакна дека прилепската чаршија и дуќаните не се само места за трговија, туку срцето на градот – простор каде што се среќаваат луѓето, се разменуваат мисли и се чува духот на заедништвото. Тој потенцираше дека прилепскиот еснаф со генерации ја гради препознатливоста и топлината на градот, а традицијата што се негува од 1954 година е потсетник за значењето на трудот, чесноста и меѓусебната почит.
Градоначалникот нагласи дека Општина Прилеп ќе продолжи да биде поддршка на дуќанџиите и трговците, со цел зачувување на нивниот труд, поттикнување на локалната економија и јакнење на врската меѓу традицијата и иднината на градот.
„Нека е за многу години!“, порача Проданоски по повод празникот.
