ЈЗУ Здравствен дом „Нада Михајлова“ во Пробиштип е централната здравствена установа во општината, која во изминатиот период изгуби дел од својот простор поради пренамената за потребите на најавениот Дом за стари лица. Дел од просториите се одземени од здравствената установа, но тие денес не се користат ниту од Здравствениот дом, ниту за новата намена, што создава дополнителни потешкотии за функционирање на установата.
Првичниот план за проектот „Дом за стари лица“, најавуван од актуелниот градоначалник Драган Анастасов, предвидува изградба на нов, посебен објект. Наместо тоа, беше започната реконструкција на дел од постојната зграда на Здравствениот дом. Овој потег отвори прашања во јавноста за влијанието врз здравствените услуги, бидејќи одземениот простор ја намали функционалноста на установата и ги влоши условите за работа на лекарите и останатиот персонал.
Дополнителна неизвесност создава фактот дека градежните активности во пренаменетиот простор се стопирани, а локалната власт досега не понуди официјално објаснување за причините. Како резултат на тоа, општината моментално нема нов капацитет за згрижување на постарите лица, додека Здравствениот дом функционира со намален простор и ограничен капацитет.
Иако Домот за стари лица беше претставуван како приоритетен проект со пошироко значење за Пробиштип и регионот, денес неговата иднина останува нејасна. Неупотребливите простории и стопираниот процес го отвораат прашањето кога и дали граѓаните ќе добијат решение кое ќе обезбеди пристап до подобрени здравствени услуги.
