Светската здравствена организација (СЗО) соопшти дека просечниот очекуван животен век на глобално ниво во 2023 година достигнал 73,3 години, приближувајќи се до нивото од 73,4 години забележано во 2019 година, пред почетокот на пандемијата.
СЗО објави извештај насловен „Глобални здравствени проценки“, во кој се анализираат трендовите поврзани со очекуваниот животен век, причините за смртност и оптовареноста од болести.
Во извештајот се наведува дека глобалната здравствена состојба продолжува да се подобрува, а луѓето живеат сè подолго.
„По нарушувањата предизвикани од пандемијата на Ковид-19, просечниот очекуван животен век во светот повторно се врати на ниво блиско до она пред пандемијата. Во 2023 година достигна 73,3 години, приближувајќи се до 73,4 години забележани во 2019 година. Сепак, очекуваниот животен век поминат во добро здравје бележи побавно закрепнување и во 2023 година изнесуваше 62,8 години, што е за 0,4 години помалку во споредба со 2019 година“, се наведува во извештајот.
Во документот се посочува дека незаразните болести имаат сè поголем удел во вкупната смртност. Дијабетесот, деменцијата, нарушувањата на менталното здравје и нарушувањата поврзани со употребата на психоактивни супстанции придонесуваат за зголемување и промена на оптовареноста од болести.
Според податоците на СЗО, во 2023 година дури 74 проценти од смртните случаи во светот биле предизвикани од незаразни болести, додека во 2000 година нивниот удел изнесувал 58 проценти.
Исто така, речиси осум од десетте водечки причини за смртност во светот во 2023 година биле поврзани со незаразни болести.
Во извештајот се нагласува дека оваа промена станува сè поизразена во земјите од сите доходовни категории. Во 2023 година, за првпат, заразните болести биле причина за помалку од половината смртни случаи во земјите со ниски приходи, што претставува уште еден значаен чекор во глобалната промена на структурата на заболувањата и причините за смртност.
Директорот на Одделот за податоци, дигитално здравство, аналитика и вештачка интелигенција при СЗО, Ален Лабрик, истакна дека продолжувањето на животниот век претставува едно од најголемите достигнувања на јавното здравство.
„Подолгиот живот е едно од најголемите достигнувања на јавното здравство. Следниот предизвик е да се обезбеди дополнителните години од животот да бидат поминати во добро здравје, како и здравствените системи да бидат соодветно подготвени да одговорат на променливите потреби на населението“, изјави Лабрик.
