Овие пораки се појавија на порталот Jugpress, како коментари под соопштението на Академскиот пленум.
Лицето што се потпишало како „Француз“ напишало дека „батината од рајот излегла“ и дека „би им ги скршил коските“, придружено со навреди од типот „ѓубради усташка“. Од Академскиот пленум истакнуваат дека заканите ги доживуваат крајно сериозно, оценувајќи дека тие се директно поттикнати од говорот на омраза што владее во јавниот простор, особено преку медиумите блиски до власта на Александар Вучиќ.
„Овие закани не се само излив на индивидуална омраза, туку резултат на атмосфера што ја создава самата власт преку континуирана демонизација на критичките гласови“, се наведува во реакцијата на Академскиот пленум. Поради тоа, тие јавно го повикуваат Одделот за високотехнолошки криминал да го утврди идентитетот на лицето што ги упатило заканите и против него да биде покрената соодветна кривична постапка.
Истовремено, Академскиот пленум повторно апелира до актуелната власт да се воздржи од какви било обиди за предизвикување нереди и насилство за време на комеморативната шетња — било преку испраќање провокатори, ангажирање маскирани лица или на кој било друг начин.
Студентите во блокада нагласуваат дека собирот е замислен како мирен и достоинствен чин, посветен на жртвите кои трагично го загубија животот под надстрешницата на Железничката станица во Нови Сад.
„Нашата намера е граѓаните на Србија да можат мирно и со почит да се сеќаваат на настраданите – без страв, без омраза и без политичка злоупотреба“, порачаа студентите.
