Охрид сè повеќе се позиционира како дестинација за здравствен туризам, откако во стоматолошкиот центар „Д-р Баткоски“ расте бројот на странски пациенти, особено од Италија, кои доаѓаат на третмани комбинирани со престој на охридската ривиера.
Според најавите, кон крајот на март и почетокот на април се очекува нова организирана група посетители од Италија, што покажува дека интересот за вакви услуги континуирано се зголемува.
Концептот што се развива во Охрид е комбинација на стоматолошки третман со туристичко искуство – пациентите доаѓаат на интервенции по европски стандарди, а истовремено престојуваат неколку дена во градот и ја користат туристичката понуда.
Овој модел веќе е познат во повеќе европски земји, а сега се применува и во Македонија, со што здравствените услуги стануваат дел од туристичката економија
Здравствениот туризам носи двоен бенефит – директен приход за медицинските центри и дополнителна потрошувачка во хотелите, рестораните и локалните услуги. Ваквите иницијативи придонесуваат за продолжување на туристичката сезона и зголемување на бројот на странски гости надвор од летниот период.
Со зголемувањето на интересот од странство, Охрид постепено се профилира како регионален центар за стоматолошки услуги со европски стандарди, што отвора нови можности за развој на здравствениот туризам во земјата.
