Заштитата на рибниот фонд во Охридското Езеро и понатаму се соочува со сериозни предизвици на терен. Надлежните институции предупредуваат дека илегалниот риболов и неконтролираната експлоатација остануваат меѓу најголемите закани за опстанокот на ендемичните и заштитените видови.Особено критична е состојбата со охридската пастрмка, но и со охридската јагула. Според утврдените протоколи за заштита, дури 40 проценти од годишната квота за улов на јагула мора задолжително да се враќа назад во езерските води за да се овозможи нејзина природна репродукција и да се спречи нејзино исчезнување од екосистемот. Дополнително, пречките на нејзиниот миграциски пат и нелегален улов бараат итно спроведување на меѓународните директиви за заштита на овој специфичен вид.
Според последните податоци, во изминатиот период се регистрирани десетици прекршоци и изречени санкции за незаконски риболов во езерските води. Од надлежните инспекциски служби порачуваат дека контроли ќе се вршат континуирано во сите риболовни зони, со цел да се спречи секое неовластено уништување на рибниот фонд.
Екологистите апелираат на повисока еколошка свест и засилена соработка помеѓу граѓаните, риболовните здруженија и полицијата, нагласувајќи дека долгорочниот опстанок на езерските видови не зависи само од вештачкото порибување, туку првенствено од строгото почитување на законските прописи и ефикасната заштита од криволов.
