Европратеникот од групата на социјалистите и демократите, Тијс Ројтен, предупреди дека финансиските средства на Европската Унија наменети за Србија се сериозно загрозени. Во изјава за порталот „Savremena politika“, Ројтен испрати јасна порака до српскиот претседател Александар Вучиќ: „Ова станува многу сериозно“.
„Се надевам дека наскоро ќе видиме сериозна одлука од Комисијата, која верувам дека лесно може да се оправда со цврсти аргументи“, рече Ројтен, додавајќи дека е длабоко загрижен поради нападите, заплашувањето и притисоците врз новинарите во Србија. Тој нагласи дека ЕУ мора политички јасно да стави до знаење дека ваквата состојба не е компатибилна со амбицијата на Србија да стане членка на Унијата.
Ројтен скептично се осврна и на новиот Оперативен тим, оценувајќи го како повторување на веќе видено сценарио. Тој потсети дека на почетокот на 2025 година српската страна дошла во Европскиот парламент со исти ветувања, на што тој тогаш одговорил едноставно: „Покажете ни“. Сега, вели, потребни се конкретни резултати, а не усвојување на еден или два закони кои повеќе личат на обид да се смири Европската комисија.
Во исто време, Ројтен изрази почит кон ректорот на Белградскиот универзитет, кој јавно застана зад своите студенти и се заложи за академска слобода и безбедност. Тој заклучи дека останува силен поддржувач на проширувањето и дека Западен Балкан не смее да биде оставен настрана.
