Раздвижени улици, полни тераси и плажи – Охрид деновиве живее во полн туристички ритам. Во екот на летната сезона, кога градот е преплавен со гости од земјава и странство, повторно се актуализира и прашањето за цените. Додека домашните гости сè почесто реагираат дека дел од услугите стануваат прескапи, странските туристи велат цените се пристапни.
„Многу добра вредност, односно квалитет за цената. Поевтино е од Англија“, рече турист.
„Доаѓаме од Австралија на одмор со семејството. 0129 Кога ќе споредам со Битола овде е многу поскапо, но тоа е цената на туристичко место. Цените не се превисоки“, рече друг турист.
„Спрема заслугата и акот. За нас не е лошо. Туристичко место мора да е поскапо“, изјави нашинец.
„Доаѓаме од Чешка цените се сосема во ред“, изјави турист.
„Јас би рекол дека цените се како кај нас, но сосема очекувано ова е туристичко место. Вообичаено е поскапо“, додаде друг.
„За нас не е скапо за нас е убаво, поевтино е од Словенија“, рече друг.
Угостителите велат цените се формираат согласно понудата, квалитетот на услугата, амбиентот и локацијата на локалите.
„Ќе повторам повторно, мислам дека за странските гости сме доста евтини. Можеби нашите домашни гости ги чувствуваат цените како малку повисоки и за нив можеби сме поскапи, меѓутоа тоа е цената што ја носи еден туристички град.“, изјави Асим Челик, угостител.
Од Министерството за економија предупредуваат превисоките цени можат негативно да се одразат врз туристичката сезона. Иако станува збор за пазарна економија, ценовната политика мора внимателно да се балансира за да не се наруши конкурентноста на туристичката понуда.
„Туристичка сезона е, туристичко место, меѓутоа тоа не значи дека треба да одат во вис цените. Прво, ги бркаат туристите, а од друга страна, за такви цени треба да имаме многу поволен квалитет.“, изјави Марјан Ристески, заменик министер за економија
И покрај поскапувањата, туристичките работници оценуваат дека Охрид и натаму останува меѓу подостапните туристички дестинации во регионот, пишува МРТ.
