Судењето за трагедијата во дискотеката „Пулс“ во Кочани продолжи со нови тензии во судницата, откако еден од обвинетите изјави дека поради здравствена состојба не може редовно да присуствува на рочиштата.
Обвинетиот Гроздан Милковски, сопственик на објектот во кој функционирало кабарето „Пулс“, пред почетокот на рочиштето побара од судот да најде решение, тврдејќи дека е сериозно болен и дека не може да присуствува на долготрајните судења.
Тој објаснил дека претходно бил хоспитализиран во болница, поради што едно од рочиштата било одложено. Иако во меѓувреме бил пуштен од болничко лекување, според неговите тврдења здравствената состојба и понатаму му е сериозна.
Милковски пред судот изјавил дека има сепса на градите и бактерија во грлото, поради што нема сили да седи со часови на судењата.
„Болен сум, никој не ме сфаќа сериозно. Како да доаѓам кога немам сили? Не можам да седам по пет саати и да ме возат“, изјавил тој во судницата.
Судијката Диана Илиевска Груевска изјавила дека е информирана за неговата здравствена состојба, но според информациите со кои располага судот, состојбата не е толку сериозна како што тврди обвинетиот.
Милковски најавил дека нема да доаѓа на следното рочиште, на што судијката предупредила дека доколку не се појави, судот ќе предложи мерка притвор.
На тоа обвинетиот одговорил:
„Нека ме носат и од притвор. Фала и на тоа.“
На денешното рочиште во судскиот процес се предвидува да бидат сослушани очевидци предложени од обвинителството, како дел од доказната постапка.
Судењето е дел од процесот за трагедијата во дискотеката „Пулс“ во Кочани, каде во пожарот во март 2025 година загинаа 63 лица, а стотици беа повредени, што го прави еден од најтешките настани во поновата историја на земјата.
