На Google I/O 2026 конференцијата беа претставени Gemini 3.5 Flash, Ask YouTube, Android Halo и низа нови AI функции за секојдневна употреба
Google на конференцијата Google I/O 2026 претстави голем број нови AI функции кои директно ќе го променат начинот на користење на Android телефоните, YouTube платформата и Google пребарувањето. За разлика од претходните години кога фокусот беше главно на програмерите, овогодинешниот Google I/O донесе низа функции наменети за обичните корисници и секојдневната употреба на уредите.
Една од најголемите новини е моделот Gemini 3.5 Flash кој пристигнува директно во Gemini апликацијата. Google тврди дека новиот модел носи дури четири пати побрзи одговори во споредба со претходните верзии, што треба да овозможи речиси моментални AI одговори при разговор, пишување или сумирање документи.
Големо внимание привлече и системот Gemini Omni за обработка на видео со помош на гласовни команди. Корисниците сега можат едноставно да разговараат со AI системот и со глас да менуваат позадина на видеото, да додаваат ефекти или да вметнуваат нови објекти и ликови во снимките.
Google I/O 2026 – Gemini и Android добиваат целосно нова AI димензија
Google Search исто така поминува низ огромна трансформација. Класичното пребарување со сини линкови сега се претвора во AI работен простор кој автоматски генерира интерактивни виџети, споредбени прегледи и прилагодени информации врз основа на прашањето на корисникот.
Новата функција Ask YouTube им овозможува на корисниците да поставуваат прашања директно за содржината на YouTube видеа. AI потоа ги анализира звукот и сликата во видеото и автоматски го пронаоѓа точниот момент каде се наоѓа бараната информација, со директен скок (timestamp) до соодветниот дел од снимката.
Google го претстави и системот Universal Cart кој ја обединува онлајн куповината преку различни сервиси. Производите пронајдени преку Google Search, YouTube, Gmail или Gemini сега можат автоматски да се додаваат во единствена кошничка поврзана со Google Wallet. AI при тоа автоматски ќе следи попусти, loyalty картички и цени на производите.
Една од поинтересните Android новини е и Android Halo интерфејсот. Станува збор за дискретен прстен на врвот од екранот кој ги прикажува активностите на AI асистентот во позадина без да го прекинува работењето во активната апликација. Halo практично му овозможува на корисникот во секој момент да види што AI моментално прави — од пребарување информации до автоматизирани задачи и организација на податоци.
Google очигледно се обидува целосно да го интегрира AI во секојдневното користење на Android уредите и да го претвори во постојан дигитален асистент кој активно учествува во работата на корисникот
Konekt.mk
