Уставните промени се чекорот што Северна Македонија треба да го направи за да го продолжи процесот на европска интеграција без дополнителни политички одлуки, изјави еврокомесарката за проширување Марта Кос по денешната приватна средба со македонскиот вицепремиер и министер за европски прашања Беким Сали во Брисел.
Еврокомесарката упати директен апел до Владата на Северна Македонија да ја исполни својата обврска во врска со уставните промени.
„Нема многу работи што треба да се направат. Има многу, но станува збор за еден чекор – уставните промени. Откако ќе се усвојат уставните промени, ќе можеме да продолжиме без дополнителни политички одлуки. Затоа, ова е мојот апел до Владата: Ве молам, направете го тоа, исполнете ја вашата обврска. Сигурна сум дека тогаш ќе можеме да продолжиме напред во најдобар интерес на вашите граѓани“, рече таа.
Според неа, сегашниот момент е можност Северна Македонија да напредува кон ЕУ, а таа посочи на напредокот на другите земји од Западен Балкан.
„Се надевам дека многу брзо ќе го потпишеме пристапниот договор со Црна Гора. Албанија исто така постигнува добар напредок. Затоа, ова е вистинскиот момент Северна Македонија да продолжи напред. Од политичарите во Северна Македонија зависи да ги исполнат очекувањата“, рече Кос.
Сали е во тридневна посета на Брисел, за време на која одржува состаноци со претставници на европските институции за прашања поврзани со европската интеграција и соработката со Европската Унија.
Министерството што го раководи наведува дека на состанокот со Кос се разговарало и за Планот за раст за Западен Балкан, спроведувањето на Програмата за реформи и можностите за постепено вклучување на земјата во единствениот европски пазар, програми и политики. По средбата со европскиот комесар, Сали ја нагласи потребата од попредвидлив процес на проширување, базиран на заслуги и мерливи резултати, нагласувајќи дека европската интеграција мора да донесе конкретни придобивки за граѓаните и бизнисите.
„Европската интеграција мора да биде процес што граѓаните го гледаат, чувствуваат и имаат корист од него“, рече тој.
Тие вклучуваат, рече тој, учество во Единствената европска платежна област (SEPA), можноста за проширување на моделот „Roam Like at Home“ и соработка во дигиталната трансформација.
