Литванската влада донесе одлука на неодредено време да ја затвори границата со Белорусија поради низа инциденти со таканаречени криумчарски балони, соопшти премиерката Инга Ругиниене, пренесува Украинска правда.
„Ова значи дека дипломатите и дипломатската пошта ќе можат и натаму да ја преминуваат границата, исто како и граѓаните на Литванија и на ЕУ кои се враќаат од Белорусија. Сепак, целиот друг сообраќај ќе биде стопиран. Испраќаме јасна порака до Белорусија – хибридните напади нема да бидат толерирани и ќе преземеме најстроги мерки за да ги запреме“, изјави Ругиниене.
Таа додаде дека литванската војска од денес презема „сите неопходни мерки“ за справување со балоните, вклучувајќи и нивно уништување со оружје. Според премиерката, Литванија сега има можност да ги следи нивните патеки на движење.
„Почнавме не само да го евидентираме бројот на балони, туку и внимателно да ги следиме нивните траектории. Тоа ќе ни овозможи подобра координација на нашите активности и прилагодување на работата на аеродромите“, изјави таа.
Одлуката следи по неколкудневни прекини на работата на аеродромот во Вилнус и затворање на границата со Белорусија — три ноќи по ред, односно четири пати во последната недела.
Претходно, литванскиот претседател Гитанас Науседа предложи долгорочно затворање на границата со Белорусија и ограничување на транзитот кон руската енклава Калининград.
