Фолксваген и Мерцедес објавија пад на профитот во првиот квартал, првенствено поради слабата продажба на важните пазари во Кина и САД. Нето добивката на Фолксваген се намали за 28,4 проценти во споредба со претходната година на 1,56 милијарди евра, објави групацијата во четврток. Во првите три месеци од претходната година, профитот изнесуваше 2,19 милијарди евра, што веќе беше 41 процент под вредноста од 2024 година.
Приходите се намалија за 2,5 проценти, на 75,7 милијарди евра, а оперативната маржа се намали од 3,7 проценти минатата година на 3,3 проценти во 2026 година.
„Условите се неповолни поради војни, геополитички тензии, трговски бариери, построга регулатива и интензивна конкуренција“, рече извршниот директор Оливер Блум.
Групацијата е дополнително оптоварена со слаба продажба во Кина и САД. Глобалната испорака на сите брендови под капата на Фолксваген се намали за четири проценти, на 2,05 милиони возила. Падот на овие два пазара ја поништи подобрата продажба во Европа.
Бизнисот на групацијата беше силно погоден од резултатите на Порше, чија нето добивка се намали за речиси една четвртина, и одделот за камиони Тратон, кој имаше вонредни трошоци.
Еден ден претходно, Мерцедес објави само малку помалку поволни податоци за работењето во првите три месеци, со речиси идентично објаснување. Тој го прeпиша падот од 17,2 проценти на нето добивката првенствено на слабата продажба во Кина.
Нето добивката од 1,43 милијарди евра се споредува со 1,73 милијарди во првиот квартал од минатата година, кога Мерцедес објави пад од 43 проценти. Во исто време, Мерцедес имаше слаби резултати во 2024 година. Концернот со седиште во Штутгарт одговори со програма за намалување на трошоците.
