Фото:википедија
Чешката влада даде поддршка на предложената уставна измена, со која би се барало мнозинство од три петтини во парламентот за какво било идно воведување на еврото. Овој предлог би ја направил чешката круна национална валута загарантирана со Уставот. Сепак, сè уште не е обезбедено потребното мнозинство за изгласување на ваква измена на Уставот, пишува „Ројтерс“.
Чешка е една од шесте земји-членки на Европската унија кои ја задржаа својата национална валута и моментално нема одредено целен датум за пристапување кон еврозоната. Популистичката влада на премиерот Андреј Бабиш, со поддршка од десничарските партии, вети дека за време на својот мандат нема да иницира влез во еврозоната – став што го застапуваа и претходните влади.
Иако неколку земји од Централна и Источна Европа не планираат да го воведат еврото, Унгарија, под водство на новиот премиер Петер Маѓар, ја промени својата политика и го постави воведувањето на заедничката валута како еден од своите приоритети.
Владејачката коалиција во Чешка нема мнозинство од три петтини, неопходно за промена на Уставот. За предлогот да биде усвоен, ќе мора да се обезбеди поддршка од дел од опозицијата, што во моментов изгледа неизвесно. Министерот за надворешни работи, Петр Мацинка од десничарската партија „Мотористи“ (Motoristi), изјави дека пристапувањето кон еврозоната е толку важен чекор, што секоја влада мора да има силен мандат за тоа.
Предлогот наидува на противење од страна на Чешката индустриска асоцијација. Од оваа асоцијација се залагаат за воведување на еврото и посочуваат дека 65 отсто од чешкиот извоз завршува во земјите од еврозоната. Чешката народна банка зазема неутрален став во однос на овој правен предлог.
