Во рамки на состанокот на министрите за економија од Берлинскиот процес во Лондон, министерката за економија, Нина Божиновска, оствари работна средба со Питер Кајл, министер за бизнис и трговија и претседател на Одборот за трговија на Обединетото Кралство.
Средбата беше посветена на продлабочување на соработката меѓу Македонија и Велика Британија, со посебен акцент на отворањето на нови канали за приватни инвестиции во енергетиката, транспортот и инфраструктурата со низок јаглероден отпечаток.
Една од клучните теми беше иницијативата „Бела листа на таксономијата за одржливо финансирање за земјите од Западен Балкан“, заедничка регионална рамка која ќе овозможи полесна идентификација и финансирање на вистински зелени и одржливи проекти.
„Со партнерите од Обединетото Кралство ја споделуваме истата визија – да се ослободат нови извори на приватен капитал за зелени инвестиции и да се поттикне економскиот раст на целиот регион,“ изјави министерката Божиновска по средбата.
Средбата ја потврди посветеноста на Македонија на европската зелена агенда и регионалната економска интеграција, како и континуираната поддршка од Велика Британија за спроведување на одржливи и иновативни економски политики.
