Министерката за енергетика, Сања Божиновска, во улога на претседател на Почесниот одбор, свечено го отвори 13. советување на „Мако-Сигре“, најзначајниот регионален настан посветен на електроенергетските системи и одржливиот развој на енергетиката. Настанот ги обединува најистакнатите инженери, експерти, компании и институции од земјата и регионот со цел размена на искуства и најдобри практики за иднината на енергетскиот сектор.
Во своето обраќање, министерката Божиновска истакна дека „Мако-Сигре“ претставува вистинска платформа за градење мостови меѓу науката, инженерството и политиките, со што се овозможува подобра координација во процесот на енергетска транзиција и усогласување со европските стандарди.
„Енергетиката денес се наоѓа на пресвртна точка. Ние мораме да ја комбинираме експертизата на инженерите, знаењето на академијата и визијата на институциите за да создадеме стабилен и одржлив систем. ‘Мако-Сигре’ е токму тоа место – каде идеите стануваат политики, а знаењето се претвора во дела,“ изјави министерката.
Божиновска ги наведе и стратешките приоритети на Министерството за енергетика во наредниот период:
Јакнење на енергетската сигурност преку инвестиции во модернизација на електроенергетската мрежа и зголемување на стабилноста на системот.
Поддршка на обновливите извори на енергија, со цел зголемување на домашното производство и намалување на зависноста од увоз.
Инвестиции во човечки капитал и знаење, преку обуки, едукации и соработка со академските институции.
Поттикнување на иновации и дигитализација, како предуслов за ефикасен, транспарентен и отпорен енергетски систем.
Регионална соработка и усогласување со европските енергетски политики, за побрза интеграција во европската енергетска заедница.
„Одржливата енергетика започнува со знаење, иновации и визија. Само така можеме да изградиме систем што ќе обезбеди сигурна, достапна и чиста енергија за сите граѓани,“ потенцираше министерката Божиновска.
Настанот, кој трае неколку дена, вклучува сесии посветени на теми како дигитализација на електроенергетските системи, интеграција на обновливите извори, енергетска ефикасност и регионална соработка.
Заклучоците од советувањето ќе послужат како предлог-насоки за идни политики и технолошки решенија што ќе помогнат во исполнување на климатските и енергетските цели на Македонија.
