Apple се подготвува да претстави нова генерација AirPods со вградени камери, а откриеното демо во macOS Tahoe 26.7 сугерира дека уредот е блиску до официјално лансирање.
Apple работи на AirPods со вградени камери, а ново откритие во тест-верзијата на macOS Tahoe 26.7 дава можеби најконкретен доказ досега дека технологијата наскоро би можела да стане реалност.
Кратко видео пронајдено во release candidate верзијата на оперативниот систем прикажува како камерата на AirPods се користи за препознавање на објекти во околината. Во демото, корисник држи книга пред себе, а камерата на слушалките го снима насловот. Потоа функцијата Visual Intelligence може да ја обработи информацијата и да ја зачува за подоцна.
Според откриените информации, камерите ќе бидат директно поврзани со Visual Intelligence, додека Siri ќе може да одговара на прашања поврзани со она што го гледа корисникот околу себе и да запишува или зачувува релевантни информации.
Во macOS Tahoe 26.7 дури постои и референца за поставување на Visual Intelligence на AirPods, што дополнително укажува дека функцијата е дел од конкретен производ, а не само експериментална технологија.
Apple очигледно размислува и на практичноста при користењето. Доколку косата ги прекрива слушалките, системот ќе предупреди дека AirPods не треба да бидат покриени за да се добијат што е можно попрецизни информации за околината.
Новиот производ во системските датотеки се појавува под кодното име B790. Истото кодно име претходно го спомна и новинарот Марк Гурман, кој наведе дека камераските AirPods би можеле да бидат претставени уште во септември.
https://x.com/aaronp613/status/2089522745184760112?s=20
Тоа отвора можност Apple да ги претстави заедно со новата генерација iPhone модели, вклучувајќи ги iPhone 18 Pro, iPhone 18 Pro Max, како и долгоочекуваниот преклопен iPhone Ultra.
Доколку информациите се покажат точни, камерите би можеле да претставуваат една од најголемите промени во историјата на AirPods – од класични безжични слушалки, тие би се трансформирале во уред способен да ја „разбира“ околината преку комбинација од камера, вештачка интелигенција, Visual Intelligence и Siri.
Во macOS Tahoe 26.7 се пронајдени и повеќе други референци кон B790, како и кон низа досега непредставени Apple производи, што дополнително ја засилува можноста дел од нив да бидат откриени во текот на претстојниот период.
