Поранешниот претседател на Советот на јавните обвинители, Антонио Јолевски, е назначен за вршител на должноста виш јавен обвинител во Битола, на местото на Пецо Везировски, против кого се води постапка под сомнение за примање награда за противзаконито влијание.
Одлуката е донесена на 53. седница на Советот на јавните обвинители, одржана на 13 октомври, откако Основниот кривичен суд Скопје го известил Советот дека на Везировски му е определена мерка на претпазливост со забрана за извршување одредени работни активности поврзани со кривичното дело.
Од Советот информираат дека претходната одлука со која Везировски беше назначен за в.д. виш јавен обвинител е ставена надвор од сила, по што за нов вршител на должноста е именуван обвинителот Антонио Јолевски од Вишото јавно обвинителство во Битола.
Основното јавно обвинителство за гонење организиран криминал и корупција на 7 октомври соопшти дека е поведена постапка против Везировски поради сомнение за кривично дело примање награда за противзаконито влијание, предвидено во член 359 став 3 во врска со став 2 од Кривичниот законик.
Според Обвинителството, обезбедени се докази кои упатуваат на сомнение дека тој ја искористил службената положба и влијанието за недозволено да влијае врз одлучувањето на други јавни обвинители и судии во најмалку четири одделни предмети. Наводно, интервенирал за изрекување пониски казни или за обезбедување поповолна положба за осомничени и обвинети лица во кривични постапки.
На Везировски, по предлог на Обвинителството, судија на претходна постапка при Основниот кривичен суд Скопје му определи мерки на претпазливост – одземање на патната исправа и забрана за преземање определени работни активности.
Против решението на судот странките имаат право на жалба пред Кривичниот совет на Основниот кривичен суд Скопје.
