Нова пратка од 9.502 килограми пиперки со потекло од Македонија ќе биде уништена откако лабораториските анализи во Бугарија откриле остатоци од пестициди над максимално дозволеното ниво. Пиперките не биле пуштени на бугарскиот пазар, ниту во продажната мрежа на Европската Унија.
Несоодветноста била откриена во рамките на засилениот надзор на свежото овошје и зеленчук наменето за бугарскиот пазар. Бугарската агенција за безбедност на храната соопшти дека целата пратка ќе биде упатена на уништување.
Ова е втора пратка македонски пиперки запрена од бугарските инспектори за помалку од еден месец. Во август беше откриена пратка од 11,6 тони во која лабораториските испитувања покажаа присуство на пестицидот форметанат над дозволената граница.
Со новите 9,5 тони, вкупното количество македонски пиперки недопуштени до пазарот надмина 21 тон. Бугарската агенција потврдува дека станува збор за две одделни пратки откриени во рамките на засилените контроли.
За новата пратка засега не е соопштено која активна супстанција била пронајдена, колкава концентрација измерила лабораторијата и за колку била надмината дозволената граница. Не се објавени ниту местото на производство во Македонија, граничниот премин преку кој влегла стоката, производната серија или датумот кога биле земени примероците.
Без овие податоци не може да се утврди дали двете пратки се поврзани со ист производител, откупен центар или земјоделски регион. Не може да се процени ниту сериозноста на здравствениот ризик од новата пратка, бидејќи не се познати видот и измереното ниво на пестицидот.
Нема лабораториски доказ дека пиперки од спорните серии се продавале и на македонскиот пазар. Сепак, повторувањето на случајот отвора прашања за контролата пред извозот, следливоста на производството и можноста други количини од истите серии да останале во земјата.
Агенцијата за храна и ветеринарство и Државниот инспекторат за земјоделство треба да соопштат од каде потекнува новата пратка, кој пестицид бил откриен, дали се проверуваат производителите и откупувачите и дали се земени примероци од други количини поврзани со истото производство.
