Netflix го објави првиот трејлер за мрачниот трилер „Unabomber“, во кој Џејкоб Тремблеј го толкува младиот Тед Качински. Гледачите веќе почнаа да ја споредуваат неговата улога со изведбата на Овен Купер во серијата „Адолесценција“.
Џејкоб Тремблеј, кој стана познат како дете во филмот „Соба“ со Бри Ларсон, ја презема улогата на младиот Тед Качински во новиот филм.
Заплетот го следи неговото патување од тинејџерско чудо од Харвард до човекот кој ќе стане озлогласениот домашен терорист познат како Unabomber.
Првиот трејлер дава увид во психолошкиот трилер чија премиера е закажана за 25 септември. Заедно со Тремблеј, глумат Расел Кроу и Шајлин Вудли.
Тремблеј го игра Качински уште од неговите 16 години, кога се запишал на Универзитетот Харвард. Филмот се занимава со неговите проблематични рани зрели години и процесот на радикализација.
Кроу го игра психологот и професор од Харвард, Хенри Мареј, кој го подложил Качински на контроверзни психолошки експерименти кога бил студент.
Дејството се префрла децении подоцна во голема операција на ФБИ насочена кон идентификување и апсење на Унабомбер. Вудли ја игра агентката Џоан Милер, додека истрагата постепено почнува да го открива минатото на Качински.
Качински поминал речиси две децении водејќи бомбардирачка кампања за време на која испраќал и поставувал рачно изработени експлозивни направи. Во тие напади, тројца луѓе биле убиени, додека 23 биле ранети.
Негови цели биле луѓе поврзани со технологијата и модерното индустриско општество, додека неговиот идентитет им останал непознат на истражителите со години. Случајот на крајот станал една од најдолгите и најозлогласените потера по луѓе во историјата на ФБИ, сè до апсењето на Качински во 1996 година.
Сепак, „Унабомбер“ нема да се фокусира исклучиво на полициската истрага. Филмот се занимава и со психологијата на главниот лик и темите за изолација, опсесија и радикализација, со осврт на настани од неговиот претходен живот.
По објавувањето на трејлерот, токму изведбата на Тремблеј привлече посебно внимание.
„Џејкоб Тремблеј влегува во толку сложена и предизвикувачка улога. Ова веќе изгледа интензивно, а 25 септември не може да дојде доволно брзо“, „Гледањето како Џејкоб Тремблеј се справува со тешка психолошка улога во ‘Унабомбер’ ме потсетува на Овен Купер во ‘Адолесценција’“, „Ретко е да се видат млади актери како се справуваат со ова ниво на внатрешна траума без да се чувствуваат принудени. И двајцата имаат оваа нереална зрелост на екранот“, беа само некои од коментарите на социјалните мрежи.
Споредбата е особено значајна откако изведбата на Купер како 13-годишниот Џејми Милер стана една од главните теми на разговор за серијата „Адолесценција“, кога британската драма привлече големо внимание на Нетфликс во 2025 година.
Серијата во четири дела следи ученик обвинет за убиство на соученик, додека напнатата трета епизода главно се состои од разговор помеѓу Џејми и психолог. Купер имал само 15 години кога е снимена серијата, а подоцна добил широко признание за неговата емоционално напорна изведба.
Тремблеј, од друга страна, се справува со напорни улоги уште од раното детство. Тој имал девет години кога во 2015 година бил објавен филмот „Соба“, во кој го играл Џек, момче кое целиот свој живот го поминало затворено со својата киднапирана мајка пред да избегаат заедно.
Денес, на 19-годишна возраст, неговата трансформација во Качински предизвика поинаква реакција кај некои гледачи, неверица поради тоа колку време поминало од неговата детска улога.
Исто така, имаше гледачи кои изразија загриженост во врска со драматизацијата на животот на еден вистински терорист од страна на Нетфликс.
„Ова може да биде или брилијантно или неверојатно контроверзно. Нема средина“, „Застрашувачка приказна заснована на вистински злостор што истражува изолација, радикализација, опсесија и една од најдолгите потера по луѓе во историјата на ФБИ“, пишуваат тие.
Заедно со Тремблеј, Кроу и Вудли, во глумечката екипа се и Анабел Волис, Александар Лудвиг, Стивен Ог и Марк Менчака.
Филмот е режиран од Јанус Мец според сценарио на Сем Чалсен и Нелсон Гривс, а филмот ќе биде достапен на Нетфликс од 25 септември.
Фото: Принтскрин/YouTube
