Компанијата Мета е задолжена со одлука на суд во американската сојузна држава Ново Мексико да исплати 567 милиони долари, најголем дел од нив во фонд за ментално здравје на тинејџерите како надомест за штетите предизвикани преку своите платформи Фејсбук, Инстаграм и Ватсап.
Според судската одлука, 420 милиони долари ќе бидат наменети за лекување и поддршка на менталното здравје на тинејџерите, додека преостанатиот дел од средствата ќе се користи за финансирање програми за подигање на свеста, превенција, скрининг и покривање на други трошоци во следните пет години.
Одлуката доаѓа само неколку месеци откако, во март, една порота ѝ наложи на Мета да исплати уште 375 милиони долари отштета, утврдувајќи дека компанијата свесно му наштетила на менталното здравје на децата. Со тоа, вкупните финансиски обврски на компанијата во овие судски постапки достигнуваат 942 милиони долари.
Од Мета соопштија дека не се согласуваат со двете судски одлуки и најавија дека ќе поднесат жалби.
Јавниот обвинител на Ново Мексико, Раул Торез, ја оцени пресудата како значајна победа за родителите и децата, нагласувајќи дека таа испраќа јасна порака за одговорноста што дигиталните платформи ја имаат во заштитата на малолетниците.
Во меѓувреме, Мета и понатаму се соочува со илјадници слични тужби од семејства кои тврдат дека социјалните мрежи негативно влијаеле врз менталното здравје и благосостојбата на децата и адолесцентите.
