Компанијата Samsung Display започна со производство на OLED панели наменети за преклопливиот iPhone на Apple.
Првиот преклоплив iPhone на Apple, за кој се шпекулира дека на пазарот ќе биде претставен под името iPhone Ultra, се очекува да дебитира во септември. Во април беше потврдено дека Apple го избрал Samsung Display како ексклузивен добавувач на преклопливи OLED панели за уредот, а според нов извештај од истиот извор, компанијата добила одобрение за почеток на производството на овие панели.
Производствениот погон на Samsung Display во Виетнам веќе започнал со работа, а Apple наводно побарал компанијата годинава да произведе почетна серија од 3 милиони OLED панели.
Иако претходен извештај тврдеше дека Apple за својот прв преклоплив iPhone ќе ја користи OLED структурата M14 на Samsung Display, најновите информации укажуваат дека компанијата сепак се одлучила за поновиот M16 луминесцентен материјал.
Се наведува дека структурата M16 OLED нуди поголема осветленост, подобрена репродукција на бои, подобра енергетска ефикасност и подолг работен век.
Исто така, се тврди дека OLED панелите ја користат технологијата Color Filter on Encapsulation (CoE), односно филтер за бои интегриран во слојот за енкапсулација, што придонесува за потенка конструкција на екранот и поголема ефикасност на приказот.
