Паркот „Ринија“ денес го потврди вистинското значење на своето име, претворајќи се во место исполнето со насмевки, музика и позитивна енергија, истакна градоначалникот на Општина Чаир и копретседател на ВЛЕН, Изет Меџити.
Во пријатна и топла атмосфера, млади музичари настапија пред жителите на населбата, додека децата, семејствата и останатите посетители уживаа во посебна вечер исполнета со живост, креативност и чувство на заедништво.
„Под светлата на паркот се создаде прекрасен момент што покажа дека јавните простори го добиваат своето вистинско значење кога се исполнети со живот и луѓе“, порача Меџити.
Тој нагласи дека Паркот „Ринија“, кој е развиен благодарение на ангажманот на жителите од населбата, поддршката од Општина Чаир и придонесот на приватниот сектор, денес претставува успешен пример за соработка што носи позитивни промени и го подобрува квалитетот на живот на граѓаните.
Според Меџити, ваквиот модел на партнерство меѓу граѓаните, институциите и бизнис-заедницата треба да биде поттик и инспирација и за другите населби да покренат слични иницијативи, создавајќи повеќе живи, безбедни и функционални јавни простори.
„Кога општеството се обединува, се создаваат простори кои не се само паркови, туку места каде што се раѓаат спомени, се развиваат таленти и се зајакнува чувството на припадност“, истакна Меџити.
