Претседателката на Европската комисија, Урсула фон дер Лајен, денес изјави дека двете главни теми на самитот на ЕУ – Западен Балкан се Планот за раст и проширувањето, и дека самото проширување е стратешка компонента што значи поголема безбедност, поголем просперитет и поголемо место за Европа во светот.
Таа им изјави на новинарите во Тиват, пред почетокот на самитот, дека Планот за раст функционира добро, но и дека земјите-кандидатки мора да спроведат реформи за да имаат еднакви услови.
Како што рече, со реформите доаѓаат и инвестиции.
Зборувајќи за проширувањето, фон дер Лајен рече дека проширувањето се базира на заслуги, но дека процесот на проширување мора да се направи побрз и покредибилен.
„Со други зборови, ако земјата-кандидат спроведува реформи, таа мора да постигне напредок во затворањето и отворањето на поглавјата и кластерите на својот пат кон Европската Унија. И процесот на проширување мора да биде повидлив. Земјите-кандидатки мора да им ги објаснат на своите граѓани придобивките од проширувањето, но од наша страна, земјите-членки мора да им ги објаснат и на нашите граѓани придобивките од проширувањето. А ова е стратешка компонента: проширувањето значи поголема безбедност, поголем просперитет и поголемо место за Европа во светот. Значи, постои моментум. Мораме да го промениме овој моментум и да го претвориме во движење, а движењето во членство“, рече таа.
