Со „Сестри“ на Дина Дума (фото), денеска (1 јуни) започнува јунскиот циклус на бесплатно прикажување македонски филмови во Синеплекс. Агенцијата за филм го промовираше овој проект минатиот месец и предвидува бесплатни проекции на македонски филмови секој понеделник од 18 часот. Влезот е по принципот „прв дојден, прв услужен“, без претходна резервација на билети.
Во текот на овој месец ќе можат да се гледаат и документарецот „Плати и жени“ на Атанас Георгиев (8 јуни), „Сите го бараат Реџо“ на Ибер Деари (15 јуни) и „Домаќинство за почетници“ на Горан Столевски (22 јуни), додека на 29 јуни на програмата ќе бидат четири кратки филма: „Материјал за аудиција“ на Ѓорче Ставрески, „Амби“ на Марија Апчевска, „Без љубов“ на Дина Дума и „Налепница“ на Георги Унковски.
Директорот на Агенцијата за филм, Сашко Мицевски, кажа дека со овој проект сакаат да го доближат македонскиот филм до публиката и да му дадат поголема видливост.
„Сакаме македонскиот филм да не се гледа само на фестивали, туку да биде достапен за сите и да стане дел од секојдневието. Со оваа соработка го враќаме филмот таму каде што најмногу му прилега – на големото платно“, изјави Мицевски.
(Фото: „Лист продукција“)
