Во необичен и историски момент, во Пекинг за првпат роботи успеаја да ја поминат целта на полумаратон пред луѓето. Трката долга 21,1 километар донесе сцена каква досега не е видена – додека човечките натпреварувачи исцрпени паѓаа на земја, хуманоидните роботи останаа стабилни и без знаци на замор.
Најголемо внимание привлече роботот Lightning, развиен од кинеската компанија Honor, кој ја заврши трката за 50 минути и 26 секунди. Ова време е значително подобро од актуелниот светски рекорд кај луѓето, кој го држи Jacob Kiplimo со 57 минути и 20 секунди.
Напредокот е огромен ако се спореди со минатата година, кога најдобриот робот имаше време над два часа, а дел од учесниците не успеаја ни да ја завршат трката. Оваа година, пак, неколку роботи беа побрзи и од професионални атлетичари, а значаен дел од нив трчаа целосно автономно, без човечка контрола.
Иако технологијата сè уште е во развој, експертите сметаат дека ваквите достигнувања ќе имаат големо влијание врз индустријата. Подобрувањата во издржливоста, стабилноста и системите за ладење може да се применат и во други области, особено во производството и автоматизацијата.
Сепак, масовната употреба на вакви роботи нема да се случи веднаш. И покрај тоа, јавноста веќе е импресионирана од напредокот, а многумина сметаат дека ова е јасен сигнал за почеток на нова технолошка ера во која машините ќе играат сè поголема улога.
