Јеменските бунтовници Хути, поврзани со Иран, се заканија дека би можеле да го затворат теснецот Баб ел-Мандеб, една од најважните поморски рути во светот. Овој стратешки морски пат ги поврзува Европа и Азија преку Суецкиот канал и е клучен за глобалната трговија и транспорт на енергенси.
Висок претставник на хутите, Хусеин ал-Ези, изјави дека доколку главниот град Сана донесе одлука за затворање на теснецот, „целото човештво ќе биде немоќно да го отвори“. Тој воедно го повика американскиот претседател Доналд Трамп да ги прекине, како што ги нарече, политиките што го нарушуваат мирот.
Хутите се дел од т.н. „Оска на отпорот“, мрежа на проирански вооружени групи во регионот. Во изминатиот период тие се вклучија во конфликтот меѓу САД, Израел и Иран, изведувајќи напади врз израелски цели. Иако во моментов престанаа со напади врз трговски бродови, хутите претходно повеќепати таргетираа пловила во Црвеното Море и Аденскиот Залив, што сериозно ја загрози безбедноста на меѓународниот поморски сообраќај.
Аналитичарите предупредуваат дека евентуално затворање на Баб ел-Мандеб би имало сериозни последици врз глобалните синџири на снабдување и цените на енергенсите, особено во време на зголемени геополитички тензии.
