Да се биде дете на меѓународна ѕвезда значи да го гледате распадот на сопственото семејство на насловните страници на сите весници. Актерката Кејт Бартон во искрено интервју споделува како успеала да излезе посилна од „мрачните периоди“ на нејзиниот татко Ричард Бартон.
Ричард, кој почина во 1984 година, се ожени со мајката на Кејт, Сибил Вилијамс, во 1949 година, а Кејт е родена во 1957 година. Како што објаснува водителот Хенри Луис Гејтс Јуниор: „Се венчаа млади, а до моментот кога се роди Кејт, нејзиниот татко веќе беше меѓународна ѕвезда“.
„Набрзо се заљуби во друга ѕвезда, Елизабет Тејлор, принудувајќи ја Кејт да го набљудува распадот на бракот на своите родители на многу јавен начин. Сепак, Кејт не само што го издржа тој хаос – од него излезе помудра, со восхит кон генијалноста на својот татко и со разбирање за неговата комплексност“, истакна Гејтс.
Кејт Бартон вели дека нејзиниот татко бил „прекрасен, полн со љубов“, но дека во текот на целиот живот се борел со алкохолизам и минувал низ периоди кога „извесно време бил добро“.
Меѓутоа, имало и „мрачни периоди“. „Навистина може да биде многу, многу тешко да се помине низ тоа. Мојата маќеа исто така имаше проблеми, но од поинаква природа. Мојот очув исто така имаше проблеми. Така што, со тоа се соочував каде и да одев“, изјави актерката.
Нејзината мајка, која се разведе од Ричард во 1963 година кога Кејт имаше 6 години, „беше единствената која ги немаше тие проблеми“, вели таа.
„Но, уште на многу рана возраст почнав да го разбирам алкохолизмот, до одредена мера. Сепак, она што навистина рано го сфатив е дека родителите можат да се разделат, а ти сепак да бидеш добро“, вели Кејт во снимката.
Романсата на Ричард со Елизабет Тејлор стана една од најпознатите во Холивуд. Се запознаа на снимањето на филмот „Клеопатра“ во 1963 година, а се венчаа двапати – првиот пат од 1964 до 1974 година, а потоа повторно од 1975 до 1976 година. Повторно се сретнаа во 1982 година на прославата на 50-тиот роденден на актерката.
Неколку дена пред Ричард да почине во 1984 година, ѝ се јавил на пријателката на Елизабет Тејлор, модната дизајнерка Вики Тил, која за магазинот „Пипл“ (People) изјави дека актерот тогаш ја искажал својата љубов кон Елизабет Тејлор.
„Пред Ричард да умре, мислам два дена претходно, ми се јави. Ми рече: ’Мислам дека нема уште долго да живеам и само сакав ти и Рон (тогашниот сопруг на Тил, шминкерот Рон Беркли) да ѝ кажете на Елизабет дека секогаш ќе ја сакам најмногу. ќе ја сакам засекогаш. Ми недостига и ја сакам со целото мое срце.‘“
