Коалицијата ВЛЕН го поздрави потпишувањето на Заедничката декларација за Коридорот 8 на министерскиот форум во Тирана, оценувајќи го како чекор од особено стратешко значење за безбедноста и евроатлантското позиционирање на државата.
Од ВЛЕН посочуваат дека Коридорот 8 не е само економски проект, туку и клучна источна–западна сообраќајна артерија која ги поврзува Јадранското и Црното Море и ја зајакнува стратешката мобилност во евроатлантскиот простор.
„Во време на геополитички предизвици, модерната инфраструктура придонесува за регионална стабилност, побрз одговор и подобра координација со стратешките партнери, во согласност со стандардите на Алијансата“, наведуваат од коалицијата.
Според ВЛЕН, Коридорот 8 отвора конкретни можности за економски развој на регионите долж трасата, привлекување инвестиции и отворање нови работни места, а истовремено ја зајакнува улогата на државата во соработката со НАТО и Европската Унија.
Коалицијата потенцира дека ќе продолжи да го третира Коридорот 8 како национален приоритет со стратешка тежина, со фокус на долгорочната безбедност, стабилност и директна корист за граѓаните.
