Од мала празнична иницијатива, „Зимска приказна“ прерасна во голем културен и туристички фестивал кој секоја година собира сè поголем број посетители и ја трансформира празничната атмосфера во градот.
Идејата за настанот се појави во 2021 година, во време на енергетска и пост-пандемиска криза, кога локалните организатори и тимот на Општина Битола решија да создадат нешто повеќе од стандардна новогодишна прослава. Целта беше да се понуди богат културен, забавен и социјален доживување за граѓаните и туристите, а не само украсен град.
„Зимска приказна“ комбинира елементи од класичните зимски базари со богата програма на музика, уметност и активности за сите возрасти, и од едно едноставно случување прерасна во фестивал со силна привлечност за посетители од целата земја, но и пошироко.
Организаторите истакнуваат дека најголем предизвик бил да се создаде содржина што ќе биде интересна за различни генерации, но и да се надмине почетниот скептицизам за новиот концепт. Со третото издание, „Зимска приказна“ веќе се смета за фестивал „за луѓето“ – место каде што заедницата учествува и ја восприема манифестацијата како дел од својот празничен ритам.
Покрај културниот ефект, настанот остави значително влијание и врз локалната економија. Преку девет дена програма, дневно илјадници посетители пристигнуваа во Битола, што придонесе за економски раст на локалните занаети, угостителски објекти и туристички активности.
Локалните уметници, занаетчии, здруженија, и образовни институции беа активно вклучени во реализацијата на фестивалот, што уште повеќе ја зацврсти улогата на „Зимска приказна“ како културен центар на зимскиот период во Битола.
Организаторите најавија дека се веќе во подготовка за следното издание со амбициозни идеи, со цел фестивалот да продолжи да расте и да ја промовира Битола како атрактивна дестинација за културен туризам во регионални рамки.
